繼網絡短片「公屋‧居屋‧私樓」後，網上討論區帖子「覺唔覺喺香港月入一萬班人真係同等死冇分別？」又引嚟網民熱烈討論。有人認為月入一萬蚊既人除非有公屋打救，否則前途就冇希望，甚至有意見認為搵一萬蚊住公屋既人好過搵兩萬蚊租私樓既人。唔通公屋，先係低收入年青人既唯一出路？

其實喺而家學位「氾濫」既年代，年青人讀完書出嚟搵一萬幾千蚊真係一啲都唔出奇，廣男當年讀完書出嚟做嘢，一樣搵唔夠一萬蚊一個月，對於錢搵得少但開支多既日子，廣男絕對明白當中既苦處。但自怨自艾改變唔到現實，要改變生活，第一個法則就係努力；唔止要努力或者比人努力，仲要不斷學習，畢竟持續進修，先係知識型社會既最好出路。

至於唔精於讀書既，本來都可以試試創業既，但香港最大問題係唔夠地，搞到租金又貴、成本又高，唉，搞到香港人創業比起其他國家艱難得多。講到底，咪又係唔夠地用囉。

至於住屋問題，廣男認同係好頭痛既，喺中產以至醫生、律師都話無能力買樓既今日，廣男真係唔敢有買私樓既打算。暫時唯一既寄望，就係一、兩年後可以抽中政府復建既居屋，但係未來幾年加埋先得一萬幾千個單位，要抽中真係一啲都唔容易。所以要上樓有望，政府一定要起多啲居屋，越多越好！不過講到底，咪又係唔夠地用，先搞到起咁少居屋囉。

除咗居屋，公屋都當然要起多啲啦，但地從何來先？如果香港無地起樓同發展，香港就真係同等死冇分別喇！家陣好多人一邊話要上樓置業，一邊又唔畀填海、重建、開發新市鎮，呢個道理廣男真係唔明，唔通啲地會由個天跌落嚟咩？

原圖：hket