立法會選舉自由黨新界西候選人周永勤，上個禮拜突然喺選舉論壇上面宣布停止競選工程，話唔想「身邊重要嘅人，惹上更高層次嘅麻煩或者賠上代價」，暗示自己受到威脅而被迫退選，又向傳媒提供「聲帶」指何君堯義工要「狙擊」他，傳媒隨即將周永勤退選一事，同何君堯劃上等號。誰是誰非，廣男唔知道，呢一刻只係好想講，周永勤嘅指控極之嚴重，當中更涉及刑事成份，就算佢點驚都好，都有責任公開交代事件，真係冇理由咁都唔肯。

聲帶所謂「狙擊」 只係舉牌、叫口號？

大家初初聽到何君堯義工計劃「狙擊」周永勤，大家可能都嚇咗一跳。但只要大家稍稍有留意香港嘅政治新聞，無論係建制抑或泛民，當佢哋或者支持者要「狙擊」某個人嘅時候，通常手段都係舉牌、叫口號同，正如2011年區議會選舉，人民力量「狙擊」民主黨一樣，稍有常識嘅人都會知道，呢種「狙擊」根本不可能令人「退選」，除非周永勤真係極度玻璃心啦，但佢做咗咁多年區議員，點睇都冇可能係咁。

再者，大家判斷呢件事，點都應該聽返周永勤係點講，佢宣布退選時係話「唔想身邊人『惹上更高層次嘅麻煩』」，照計，何君堯嘅義工點都冇可能係「高層次麻煩」。周永勤一邊暗示畀人恐嚇，另一邊向傳媒發放錄音，結果就係令人聯想到事件同何君堯有關，但諗深一層，佢從來無提出被威嚇嘅確切證據，亦冇講出到底「高層次麻煩」係乜，到底背後有咩原因呢？

自由黨領導指與何君堯義工的錄音無關

事實上，自由黨榮譽主席周梁淑怡日前都講明，多次追問周永勤，對方都拒絕透露詳情，佢自己亦相信事件同何君堯義工嘅錄音無關；該黨另一名榮譽主席田北俊亦重申，同周永勤傾談期間，對方冇提及「何君堯」三個字。誠如何君堯自己所講，如果周永勤係受到咁大威嚇，點解唔去廉政公署報案？咁樣指控不清地將矛頭指向何君堯，但又唔交代詳情，咁做對其他候選人非常唔公平。周永勤喺棄選宣言入面，指自己深深感受到「雞蛋同埋高牆嘅關係」，廣男認為周永勤自稱係雞蛋唔緊要，但至少要話畀公眾聽，高牆係咩先得架！佢有棄選自由，人家何嘗沒有聲譽？

原圖：網絡圖片截圖