「外母見女婿，口水嗲嗲渧」？都要睇下你住咩樓先！

一段改編自網絡潮文《女朋友帶你返屋企食飯》的短片，在網上數日已有超過50萬點擊，其中61歲的「甘草」演員盧宛茵傾情演出外母一角，對三個分別居住在公屋、居屋、私樓的未來女婿所表現的白鴿眼（知道你住私樓，當然唔會白鴿眼啦）表情，簡直無懈可擊。

網民大讃盧宛茵演技外，短片之所以引起廣泛共鳴，重點在於道出港男們去女朋友屋企見家長時，那種小心翼翼、想使出渾身解數表現自己，但又未能討好對方的辛酸。不少男性朋友亦坦言，去得女朋友屋企見家長，就有心理準備「審犯咁審」，而當中最殘酷的一個現實：無樓，無將來。

不是每個人都認同這個觀點，但起碼有很大部份人，很大部份希望組織家庭的年輕人的父母，都有這個擔憂。

我無帶過男朋友返屋企食飯，但每每同家人講及身邊的男性朋友，家人總會問及很多關於對方家庭背景、學歷、工作等問題。

為人父母的絕大部分總覺得自己兒子、女兒特別矜貴，希望自己個女能夠搵一個好人家，唔通希望將來「餓死老婆溫臭屋」咩？希望自己個仔搵個好老婆，入得廚房出得廳堂，最好能在事業上助一臂之力。但我又在想，如果男朋友帶你返屋企食飯見未來奶奶，又有機會發生甚麼情況？

一個單位，可以代表你對對方的愛？

一個單位的價值，可以代表一個人的價值？

利申，本人是無物業的獨居租樓一族，薪水有超過三分一都貢獻業主了。有時想想，每個人都想有個安樂窩，既是生活必須，打風落雨有瓦遮頭；亦為有心靈安全感，起碼有屬於自己的天地、有什麽事都「有野揸手」；對政府而言，市民安居樂業，有了自己的物業，就不希望政局有甚麼動盪甚麼大變，導致樓價下跌身家縮水。所以呢，有樓，真係好重要！

不過，在「公屋」、「居屋」、「私樓」背後，你所不知道的，可能是港男、港女的風光背後，隨時就是多得他（或她）帶回家吃飯那位，在精神上、心靈上、時間上、感情上的付出，才有了今天坐在飯桌前的她和他。

有些東西，比公屋更樸實、比居屋更難求、比私樓價更高。