//嗱嗱嗱，《港區國安法》通緝犯張崑陽著草海外之後，首次曝光身處美國，不停話掛念香港，又呼籲大家俾錢支持佢海外工作喎。又係出呢招？可唔可以有啲新意？//

Attention、Attention，失蹤人口出現喇！消失一年嘅《港區國安法》通緝犯、「民間外交網絡」前發言人張崑陽終自爆行蹤，宣布「正式轉戰美國」。佢喺社交網站話，已經開始向美國政府申請政治庇護程序，更加「有幸」得到美國約翰霍普金斯大學碩士班取錄兼獎學金𠻹。仲話以後要繼續開展國際線工作喎。

張崑陽呢篇社交網站帖文，延續咗走佬外國嘅政客例牌寫文風格。首要第一點就係：賣慘。張崑陽話，「最初只帶着港幣數萬元倉猝(卒)地流亡，每每諗起仍在牢獄中嘅戰友，就擔憂同慚愧。」跟住落去第二點：繼續鼓吹唱衰香港。佢話，未來要將自身經驗，影響現時及未來嘅外交官，持續將香港議題放在美國對中政策嘅核心，好好咁回饋香港。嗱嗱嗱，講完呢通長篇大論，終於切入正題：貼上捐款link呼籲大家俾錢支持佢海外工作喎。

不過自從《港區國安法》去年中生效，張崑陽就喺去年八月畏罪著草海外，但對自己身處邊度就避而不談，之後警方喺去年年底以涉嫌違反《港區國安法》通緝張崑陽，佢去向更加成謎。時隔一年，突然公布行蹤現身美國，一邊話有獎學金，入讀名校碩士，但又求包養，唔知喺香港嘅、尤其仲喺監獄嘅「手足」點睇呢？醒目嘅你哋，明嘅。

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk