日本明洗學生腦,點解大家唔去嘈?
日本明洗學生腦,點解大家唔去嘈?

傳咗一排話日本政府會改教科書指引,要求教科書列明中國稱為釣魚島既尖閣諸島,同埋南韓稱為竹島既獨島都係日本「固有領土」。南韓既竹島係點,囍雨唔敢講,只不過話釣魚島係日本既,呢樣就點都講唔過去;喂,而家日本明洗學生腦喎,係明洗腦喎,一向好憎人洗腦嗰班政客係唔係都應該出句聲?


本來人哋國家教科書指引係點,外國人又真係冇權過問既,只不過今次涉及中國既主權同領土完整,咁就唔同講法喇!你同自己下一代話釣魚島係自己既,講吓講吓,班日本學生容乜易當係真架?第時到呢班學生當家作主,腦裡面已經有固有思想,咁咪又會繼續侵犯我哋領土囉?

唔係講笑架,日本文部科學相下村博文就講到明,對領土進行正確教育,對國家來講係理所當然。嘩,咁神聖呀?講到大義凜然咁,唔知下村博文又會唔會要求日本教育書加入準確既二次世界大戰歷史呢?會唔會如實咁講畀日本學生,日本喺二次大戰期間殺咗幾多中國人、強暴咗幾多中國婦女呢?

我有時真係唔知,日本係一個高度已發展國家,點解日本既選民仲係好似唔認識歷史咁既?唔通日本都有互聯網監控,唔畀國民上網查證史實?定係日本班歷史學家好多都昧著良心,唔肯公開反駁日本政客既大話呀?

中國人,睇到呢啲新聞,你係應該要憤怒既。呢單嘢除咗涉及釣魚島呢塊小小既土地,仲關乎到日本係唔係其實從冇汲取歷史教訓,係唔係骨子裡始終懷抱住軍國主義,仍然設法建立當年所講既「大東亞共榮圈」?

香港人,千祈唔好「事不關己,己不勞心」,日本既一舉一動,隨時都會影響區內安全,到時局勢緊張,香港民生同經濟都必定受到影響。香港班政客,尤其係成日話「反洗腦」嗰班呀,唔該出句聲啦,而家日本洗學生腦,對香港都好大影響架!

原圖:huanqiu

評論