為拗而拗 難掩真相
為拗而拗 難掩真相

區議會宣誓進行得如火如荼,繼港島區之後,九龍區區議員亦喺上周五完成宣誓儀式。一如外界所料,繼續有反對派區議員被民政局局長徐英偉質疑宣誓嘅有效性,今次仲有成10個咁多。而有趣嘅係,其中涉事嘅油尖旺區議員胡穗珊同朱江瑋,日前竟然開記者會「喊冤」。但聽完佢哋所講法,囍雨只有一個感想,就係「為拗而拗」,完全唔合邏輯。如果佢哋連囍雨都說服唔到,試問點樣令當局相信係真誠宣誓?


貼「光時」口號、「轉載」初選資訊


大家要明白,宣誓嘅重點,係監誓人到底「信唔信納」當事人係「真誠宣誓」。至於點樣判斷?誓監人除咗會審視宣誓期間宣誓人係咪符合規定外,仲會睇返宣誓人過去嘅言行,藉以判斷宣誓人係咪「口不對心」。胡穗珊同朱江瑋之前發表過含「光時」口號嘅貼文同相片,而胡穗珊更幫「民主派35+初選」招募義工嘅事,出圖做宣傳,所以當局質疑兩人不符宣誓要求,要求兩人回信解釋。


被「踢爆」疑似違規,朱江瑋同胡穗珊仲係死不悔改,走出嚟狡辯,其中朱江瑋就話,自己掛嘅「光時」旗係由市民送贈,而且事件發生喺《港區國安法》生效前;而胡穗珊就聲稱,認為「光時」只係泛民「簡單口號」,無「港獨」嘅意思,而關於「初選」嘅貼文,係因為有街坊詢問,所以先轉載消息。呢啲所謂「解釋」,真係好牽強囉!


法庭裁「光時」帶「港獨」意思


先講「光時」口號,胡穗珊當然有權繼續「硬拗」,但事實擺在眼前,之前法庭喺唐英傑案判詞入面已說明,「光時」口號喺特定時空同情況下,確會有「港獨」同帶有「分裂國家」嘅意思。以朱江瑋同胡穗珊嘅反對派身份,喺反修例暴亂時期掛「光時」旗、同佢合照之類嘅行為。兩人到底有咩動機,應該心知肚明啦,徐英偉對兩人宣誓有懷疑真係無可厚非。


更搞笑嘅係,胡穗珊話自己只係應街坊要求,「轉載」初選資訊。想問一句,如果當事人唔認同內容,又點會肯幫佢轉發?好心佢啦,乜都為拗而拗、自欺欺人,有基本判斷能力嘅市民都會知道有問題。換個角度,如果有街坊問胡穗珊,話想要建制派政黨嘅活動資訊,佢會唔會幫手轉發先?肯定唔會啦,最起碼囍雨都未見過有反對派區議員會咁做囉。依家唔係做刑事檢控同調查,如果唔能夠令徐英偉信納,判斷係真誠宣誓,點爭論都係無用。


囍雨無水晶球,唔知道徐英偉最終係咪信納朱江瑋同胡穗珊嘅宣誓。但係有一點,希望反對派自己諗清楚,如果繼續係堅持呢種態度,硬係要凡事死拗、想盡辦法去抹黑政府,死不悔改嘅話,唔好話依家有可能會被人DQ,將來嘅從政路恐怕都「係咁先」啦!


原圖:星島日報

請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

29
好正
7
心心眼
14
好好笑
1
令人傷心
2
嬲爆

評論

  • acp4711@yahoo.com.hk
    acp4711@yahoo.com.hk
    2月前
    0 回應
    good
    • 龙一吟
      龙一吟
      2月前
      0 回應
      扮睡的人是喚不醒的。
      • 你的光榮,我的榮耀
        你的光榮,我的榮耀
        2月前
        0 回應
        腦殘至始,何已為政

        沒有更多評論

        沒有更多評論