禮崩樂壞的區議會
禮崩樂壞的區議會

正所謂「酒逢知己千杯少」、「對酒當歌人生幾何」,廣男相信,唔少人都喜好「杯中物」。的確,親友聚會好、自己斟酌也好,呢啲時候把酒一盞,都係一種享受。但如果喺正式嘅工作會議中飲酒,就另當別論。日前深水埗區議會會議進行期間,四個反對派區議員竟然邊開會邊公然飲紅酒,而區議會主席就放任唔理,睇到咁嘅情形,廣男只可以用四個字去形容,就係禮崩樂壞!


碰杯cheers 還「大條道理」?


話說深水埗區議會噚日(11/5)朝早9點半開會,點知開咗大約15分鐘左右,民協嘅何啟明聯同公民黨嘅周琬雯,以及報稱獨立嘅伍月蘭同劉偉聰,就喺會議期間飲紅酒。根據民建聯深水埗區議員劉佩玉提供嘅片段可見,當時其他人都開緊會,而有人就揸住酒杯行嚟行去,幫人斟完又幫自己斟,兩個人仲要碰杯「cheers!」對於有建制派區議員當場提出質疑,飲者之一嘅伍月蘭仲好大條道理咁反駁「係咪飲嘢都唔得」;而同樣係反對派嘅區議會主席楊彧更加話,《區議會條例》冇明文規定禁止飲酒,而且見不到呢啲行為影響會議進行,所以唔會禁止。


廣男好明白,評論唔同政治事件,好應該保持溫文,但今次對住呢四位反對派議員,廣男真係忍唔住要講句,簡直離嗮大譜、不知所謂!身為區議員,又執行緊自己職務,如果區議會都可以咁樣「開會」法,咁以後其他正式會議場合,係咪可以搞番場「狂野派對」?!既然有圖有片有真相,廣男認為,民政處以至政府對呢件事絕對不可不理!


亂象多多的區議會 不能再不管!


其實嚟到今日,我哋再探討區議會嘅種種問題,廣男覺得,絕對唔可以再將每一次出現嘅問題都當成「獨立事件」去睇;回顧過去呢一年多,區議會嘅亂象沒有最離譜、只有更離譜。廣男之前都寫過唔少,例如舊年一月初,葵青區議會召開首次大會,一眾反對派議員就起立齊唱「港獨」歌曲;舊年四月,油尖旺區議會就討論所謂「重組警隊」議案,去到六月,由反對派把持嘅17區區議會議員舉行「特別會議」,要求撤回《港區國安法》等等…依家更過分,有人將會議室當「酒吧」、人哋開會自己就「開party」,其實呢班人有冇尊重過自己身份、職責同埋當初選佢哋街坊呢?是可忍,孰不可忍!


有人話,依家《區議會條例》冇明文規定唔俾飲酒,廣男想講,其實根據區議員手冊,區議員必須遵守嘅規定,其中一條就係「進出議會場地,衣著、舉止必須莊重」,依家有人公然喺會議之中、議會之內飲酒,舉止肯定係唔莊重,如果咁都唔追究、不了了之,廣男恐怕,以後區議會嘅會議室會變「party room」!


原圖:劉佩玉提供


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

17
好正
7
心心眼
4
好好笑
4
令人傷心
15
嬲爆

評論

  • wai wong
    wai wong
    2年前
    0 回應 檢舉
    議會條例可以避過,但限聚令四個人一枱已經犯法,議會內咁多人坐喺度,你揸住支酒周圍走,同酒吧有何分別
    • Happy21
      Happy21
      2年前
      0 回應 檢舉
      :blush:
      • Happy21
        Happy21
        2年前
        0 回應 檢舉
        :+1:

        沒有更多評論

        沒有更多評論