喺整體受訪市民多數要求攬炒派議員離任嘅情況下，十幾個攬炒派議員依然決定「留任」，俾人插到飛起，連支持者都話一票不投佢哋；老實講，囍雨由頭到尾都係果句，想延任，咪一早決定囉，搞場睇到人「火都嚟」嘅「大龍鳳」，結果就係意見未達門檻，議員自己做「政治決定」，真係「搵嚟搞」。囍雨今日睇《生果報》，《生果報》貫徹始終地支持攬炒派留任，仲喺社評話「留任議會的泛民反映民情，勢將抗爭升級，令政府工作阻礙重重」、「林鄭政權押後選舉此延兵之計不難弄巧反拙，將民憤從街頭聚焦到議會去，激化抗爭」；對於呢種論述，囍雨只係想問一句，攬炒派喺議會，仲可以「抗爭」啲咩呢？

《生果報》的「豪情壯語」

喺《生果報》呢篇題為《抗爭將從街頭聚焦到議會》嘅社評入面，當中有一段講到未來抗爭會聚焦喺議會，仲話特首會「弄巧反拙」，囍雨先俾相關節錄大家睇下再評論：

「留任議會的泛民反映民情，勢將抗爭升級，令政府工作阻礙重重。換言之，林鄭政權押後選舉此延兵之計不難弄巧反拙，將民憤從街頭聚焦到議會去，激化抗爭。林鄭假疫情之名，拖延立法會選舉，滿以為能以時間換取空間，反卻激化民憤 。偷雞唔到蝕揸米。自以為聰明的林鄭再次為聰明所累。」

其實睇到呢段嘢，囍雨係有少少「想笑」，因為囍雨唔係好相信，攬炒派喺議會可以點樣「反映民情，勢將抗爭升級，令政府工作阻礙重重」。先講客觀條件，計票數，一般法案或議案，攬炒派阻唔到佢通過；講《基本法》23條，如果要立法攬炒派亦阻唔到；再講特權法，即係攬炒派話建制派會用嚟查黑暴運動嘅手段，攬炒派都係唔夠票阻止。喺呢啲客觀前提下，囍雨想問下《生果報》，攬炒派點樣「令政府工作阻礙重重」？

「錫身」政客仲會衝？

可能《生果報》所講嘅「抗爭升級」，係包括衝擊、肢體衝撞，但囍雨想問下，有案在身嘅攬炒派議員，仲會唔會去衝？無案在身嘅攬炒派議員，又好似一向都無衝開喎？唔通教協葉建源會去衝？又或者楊岳橋會擺副「dead body」出嚟？唔好話囍雨睇少攬炒派班議員，之前《國歌法》三讀表決，除咗鄭松泰投反對票，其他攬炒派連票都唔敢投喎！《生果報》形容到攬炒派議員好似會喺議會變到「義士」咁，大家信唔信？反正囍雨就不信了！

講真，攬炒派議員呢場「延任騷」，做到爛晒，好心《生果報》再美化佢哋啦！或者，對《生果報》以至幕後金主及大台黎智英而言，呢班延任議員係可以「為己所用」，但呢班為黎智英「所用」嘅議員，已經係負資產喇！今日先有電台聽眾以後都唔投票俾呢班攬炒派，《生果報》仲喺度塗脂抹粉，其實《生果報》一樣係咁肉酸！ 

圖片來源：RTHK

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk