公民黨陳淑莊、林瑞華一行40人上月2日喺「限聚令」之下參與「酒吧會議」，被質疑觸犯「限聚令」，更有人質疑當晚喺酒吧進行嘅會議，可能係涉及一場「選舉活動」；事隔一輪，有傳媒報道指根據警方得到嘅當晚單據，喺陳淑莊等人「開會」果段時間，酒吧係有營業。咁樣，之前陳淑莊、林瑞華稱當時酒吧已經貼上Private告示（私人）、落半閘甚至「暫停營業」等說法，咪全部都係大話嚟？呢件事真係越嚟越引人懷疑，「小二，攞多兩碟花生」嚟！
政客集體講大話？
如果大家仲有印象，喺陳淑莊、林瑞華嘅「酒吧會議」被揭發後，陳、林就以酒吧落半閘、無營業等理由推搪，稱呢個係酒吧業界會議，但之後就有人踢爆，當晚酒吧根本就有繼續營業，其他人仲可以進入酒吧飲嘢；依家有報道指警方得到單據證實酒吧當晚果段時間有營業，證明咗啲咩，就係陳、林極可能係講大話、呃市民！
呢件事嚟講，有三點廣男覺得大家要注意，就係綜合現時所有證據，陳、林極可能講大話，咁反映咗一樣嘢，就係陳、林作為從政者，根本上已經誠信破產，唔值得市民再相信佢哋。第二點，就係喺「限聚令」下，佢哋公然聚會甚至有飲酒，犯咗法嘅罪嫌極重，執法部門無可能唔跟進、調查；用另一角度睇，陳淑莊身為立法者、公職人員，當日仲口口聲聲話出席公務會議，依家被踢爆更加係「罪加一等」，加上佢有緩刑在身，如果被定罪係咪要「兩罪並罰」都值得探討。
「會議」涉及選舉嗎？
仲有一個大問題，就係之前已經有人質疑過，陳淑莊、林瑞華以至元朗區議員張秀賢喺酒吧「開會」當晚，咁啱就係立法會飲食界功能組別更新資料嘅限期，而林瑞華又考慮參選立法會飲食界別，如果有人已經向身邊人或者其他人宣布會參選，而「酒吧會議」當晚有人又用「酒水」以至食物慰勞其他人兼傾選舉工程，咁係咪犯咗同選舉相關法例呢？如果係咁，件事就唔止係犯「限聚令」咁簡單，執法部門真係要查清查楚。
事到如今，廣男覺得陳淑莊同林瑞華應該出嚟交代清楚事件，否則「大話冚大話」，只會令市民更反感，難怪公民黨近期嘅評分大跌，越嚟越多市民「離棄」佢哋！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論