佔領中環，呢幾個字大大話話都講咗近兩年，廣男一直對「佔中」行動無咩大感覺，以為「佔中」只係小型示威行動，持續一、兩日就會散BAND。點知行動持續咗五日，而且仲有升溫既跡象。因為「佔中」，令廣男呢幾日心情感到忐忑，香港唔見咗包容、理性都算，但搞到連家人、朋友都對立起嚟，一時之間互相抨擊、草木皆兵；佔領中環聲稱愛與和平、為我哋帶來轉變，請問愛在何方？！
 
網絡上既鬧交場面，相信大家都睇唔少，近日有啲新聞，真係睇到人心都噏埋：
 
有報販呼天搶地，指自己報檔嘅生意受到嚴重影響，一句「民主唔係咁爭取架！」
 
一個爸爸諗住帶小朋友去玩被擋路，直言「我都有正常使用道路嘅權利！」
 
又有旺角街坊忍受唔住，「中央政府都無影響到我日常生活，但你哋有呀嘛！」
 
一時之間，社會充滿衝擊，遊行、示威從來都係香港人既自由，但佔領行動，唔係癱瘓交通咁簡單，可能對於一啲團體嚟講，影響到香港經濟對佢哋毫無影響，但係社會上有幾個報販、打工仔、家庭受到影響？發哥周潤發呢一兩日開腔批評政府，但大家記唔記得，發哥都講過，「搵食，就係香港精神」，好多因為佔領中環而影響生計嘅人，佢哋可能係手停口停，搵一餐清一餐，係咪一群人有理想、理念，其他人既意願、利益就可以置之不顧？民主，唔係要商討、妥協嘅咩？
 
最令人心痛嘅，係警方要求示威者讓番一條路線出嚟做緊急通道，等救護車、消防車有需要既時候可以順利通過，雖然要求已經好卑微，但都唔成功。甚至，連巴士公司要將巴士拖走都唔得，呢啲唔係私人財物嚟嘅咩？緊急通道唔讓，巴士唔畀拖走，示威嘅權利，完全凌駕喺其他人嘅權利之上，道理點講得通……。
 
佔領中環行動一直宣揚愛與和平，但放眼香港，到處因為佔領中環出現對立、衝突，愛變成恨，和平變成衝突，呢啲都唔係香港人想見到嘅。戴耀廷等人曾經講過，如果佔領中環失控，會叫停行動，而家連「佔中」糾察想移走鐵欄咁小事都控制唔到，如果發生悲劇，「佔中」三子只會得個睇字！趁而家仲未發生悲劇，「佔中」三子好，學民思潮好，學聯也好，收手啦！

原圖：網絡