一邊道歉一邊鬧 許智峯始終是「對」的?
一邊道歉一邊鬧 許智峯始終是「對」的?

近日被揭「偷呃拐騙」嘅民主黨,佢嘅立法會議員許智峯喺立法會「強搶」女EO手機兼攞埋入廁所「慢慢睇」,搞到全城都怒轟佢竟然喺光天化日犯案;之前囍雨已經講過,許智峯所謂道歉,其實都好假下嘅,因為佢始終都係聲稱個女EO侵犯佢私隱所以佢先咁做。噚日,囍雨上網嘅時候又睇到許智峯有新回應,佢依然冇認自己係「搶」,只係話自己用錯方法、有錯在先咁話,講到自己始終「是對的」咁;囍雨真係好想同許智峯講一句,「你繼續兜」啦!

 

道歉但要鬧人 許智峯真「有誠意」

 

嗱,囍雨唔知許智峯知唔知咩叫道歉啦,但許智峯喺自己Facebook一邊話對個女EO心存歉意,一邊又話自己原意係想阻止政府「行政霸道」,只係自己用錯咗方法、有錯在先。囍雨又要問下許智峯,你到底係再次道歉,定係再次出嚟指責受害者呢?如果係真心道歉,又點會咁多藉口,仲要始終唔認自己搶嘢,唔通傷害完人仲要諉過於人,呢個就係「白鴿Style」?

 

更好笑嘅係,許智峯喺另一個Facebook發帖話自己去信私隱專員,質疑政府人員「監察議員」嘅做法,問有冇觸犯《私隱條例》;如果囍雨無記錯嘅話,其實私隱專員果邊已經講過政府人員喺立法會、即係公眾地方收集資料根本冇侵犯私隱,許智峯係唔知呢件事,定係扮唔知繼續去信私隱專員,營造政府「做錯嘢」嘅感覺呢?搶完人嘢、睇完人哋私隱再指責人哋有錯,許智峯將「無恥」兩個字,演繹得十分淋漓盡致!

 

一句到尾 你有冇搶嘢?

 

囍雨有時覺得,同許智峯或者同民主黨班人講太多真係無謂,事關佢哋明明就算係施害者,都可以掉轉頭話受害者有錯嘅,感覺就好似打完人兩拳,仲要同人講「你唔好用對眼啤住我,我咪唔打你囉」,認真惡棍!事到如今,大家只要需要繼續追問許智峯兩個問題,第一,就係許智峯講到自己咁「正氣」,佢答公眾佢到底有冇搶嘢先?唔好再講咩「獲得」、「取去」,乜咁大個人連中文都唔識呀?第二個問題,就係佢會唔會辭去立法會議員一職,定係佢為咗近十萬嘅議員薪津,要繼續賴死唔走?完!


原圖:RTHK

評論