香港需唔需要科技局？呢個其實係「阿媽係唔係女人」既問題。何解？剩係睇「世界經濟論壇」舊年公布既《全球競爭力報告》，香港喺「創新」一項只係排喺全球23位就知問題有幾嚴重。香港「創新」力不足，只係不斷食老本，一味靠金融同地產業「吊住條命」！

其實唔少科技業界代表早就提出，單靠金融同地產養起七百萬人根本係天荒夜譚，只有發展高新科技呢類產業高增值，先可以持續香港既競爭力。可能有人會問，多個政策局啫，有冇咁神呀？

講真，多個政策局梗係唔會即刻見效啦，不過大家都知道，政府做乜都講程序、講責任，我做政務官既，你調我去科技局，我咪主力發展科技囉，好似而家咁，留我喺商務及經濟發展局，就梗係主力做金融同地產等傳統「優勢產業」（其實係唔係仲有優勢都好值得懷疑）啦。做好份工啫，香港人最明白，RIGHT？

仲有呀，唔好話廣男用陰謀論去睇，斯諾登事件之後，全世界都知道美國佬既間諜戰略科技有幾勁抽，香港科技繼續落後於人，難保他朝會唔會畀人全面侵佔，一舖清袋。今時今日打仗，使鬼用飛機大炮咩，癱瘓你互聯網同通訊就OK啦。

設立科技局，社會本來就唔應該好多爭議，偏偏立法會裡面有四個不知所謂既議員，死都唔理真正既民意、聽都唔聽政府既建議，好野蠻咁話要「拉布」，唔理三七廿一，一於拉死佢為止，為咗政治原因（即係梁振英政府乜都做唔到）就唔做得，香港競爭力呀、市民福祉咁點？一於睬你都傻！

作為I.T.界一份子，見到呢幾個垃圾會…SORRY，係立法會議員咁做，你話點可能唔火？奉勸幾位打算又玩「拉布」既立法會議員，你哋今次咁做係冇道德基礎架，上次你哋仲可以老屈梁振英政府「打尖」，如果人哋今次真係正正經經喺施政報告提出，你哋拉布既RATIONALE又係乜呢？！

圖：網絡圖片