政府公布咗高鐵「一地兩檢」方案個幾星期，反對派不斷大力攻訐，又成立「一地兩檢關注組」要求政府進行公眾諮詢。見到反對派不斷提出呢項要求，廣男作為長期留意反對派舉動嘅宅男，即時諗起反對派近年嘅所謂「絕招」，就係先要求政府作公眾諮詢，然後鼓動支持者簽署大量一式一樣嘅反對意見書，務求營造出全城「反高鐵」嘅「結果」；呢啲咁嘅舊招數，相信政府同建制都一早睇穿晒，況且政府又講到明會大量參加立法會會議解畫聽意見，市民冇理由支持反對派去製造鬧劇吖！

公眾諮詢是拖時間的「舊劇本」

社會討論咗高鐵、「一地兩檢」安排已經有幾年咁耐，政府亦研究過好多唔同「一地兩檢」方案，就連反高鐵反到唔要法律專業嘅港大法律學院前院長陳文敏，亦早喺年前已經喺筆章撰文講「一地兩檢」，點解反對派執意要話社會冇討論呢？

廣男覺得，反對派其實今次同以往反對政府政策嘅劇本都係一樣，仍舊係「一哭二鬧三上吊」。首先，喺政府提出方案時候大力反對方案，第二步就係力迫政府做公眾諮詢，之後就做好一個反對書嘅Sample，不斷「吹雞」搵支持者簽名，交成千上萬封「完全一樣」嘅所謂「意見書」畀政府，跟手在由喉舌傳媒幫手聲稱「萬人反一地兩檢」，呢個咪反對派一貫嘅做法囉！

調番轉講，如果真係有公眾諮詢，而諮詢結果反映較多市民支持高鐵「一地兩檢」方案都好，其實都係冇用，反對派依然會繼續反對。今朝公民黨立法會議員陳淑莊就喺電台講，畀人問會唔會隨民意轉變立場果時，佢竟然厚顏到話「市民支持咪支持，我可以繼續反對」，即係話佢哋口口聲聲要公眾諮詢攞民意，但其實無論民意如何，佢哋都係會反對到底，同佢哋傾？晒氣啦！

反對派連高鐵站也不去了解

老老實實，廣男覺得其實「一地兩檢」方案未出之前，反對派已經諗好晒點反高鐵兼反政府，表面上就好似要研究、了解高鐵同「一地兩檢」，實則就係個腦諗到點反就點反，就算安排畀佢哋參觀高鐵站，show畀佢哋睇兩地口岸區界線清晰，無乜可能有人會「被自願」進入「內地口岸區」都好，佢哋連參觀都唔會去，因為參觀咗如果發現佢哋果套完全呃唔到人，佢哋係咪要連自己都呃埋先得呢？

反對派自詡為民主派，但廣男真心覺得佢哋從來都唔係民主，聽陳淑莊等人口氣，明顯就係民意支持「一地兩檢」佢哋都會繼續反對啦，信佢哋公眾諮詢收民意，真係太天真、太傻了！

原圖：RTHK