政府今日公布首批副局長同政治助理名單，政府委任前教聯會副主席蔡若蓮出任教育局副局長。自從有消息傳出蔡若蓮有可能做副局長，反對派就從未停止過對蔡若蓮進行政治攻訐，好似噚日之嘛，香港眾志一班成員踩上教聯會會址，話要搵蔡若蓮當面對質，擺到明就係要搞事啦。廣男認為，香港眾志等反對派團體表面上係反對蔡若蓮，實則係藉「炒作」話題撈政治籌碼，所有行動都只「私利」，所以公眾利益，只係政治口號啫！

到教聯踩場 極度胡鬧

廣男唔肯定點解香港眾志等反對派團體一直要針對蔡若蓮，可能係因為黃之鋒等人係學民思潮出身，「天生」就有義務同政府教育政策以及相關人等對著幹，但廣男覺得佢哋踩場然後加插罪名喺其他組織身上嘅做法相當唔可取。首先，佢哋去教聯會會址聲稱要同蔡若蓮對質，本身已經勁有問題。對質？對質乜嘢？做咩要同你對質？正正常常交流尚可，拎晒標語貼去教聯會會址又係咩玩法？咁仲唔係搞事？

再者，大家撫心自問，無啦啦有一班人衝上自己會址搞事，換轉係大家都肯定會「閂門」啦，香港眾志班人上到去見冇人應門，一時話教聯會冇開門、一時又話冇得同蔡若蓮對話，算唔算惡人先告狀？況且，點解呢班人會覺得蔡若蓮會喺教聯會會址裡面？蔡若蓮身為校長，乜成日會留喺教聯會架咩？傻的嗎？

睇番蔡若蓮履歷，做過教育局負責校本課程及語文教學支援工作，又有前綫教學及管理學校嘅經驗，可謂非常到位，講到尾，香港眾志所做嘅一切，咪又係一場政治SHOW！由反蔡若蓮做副局長開始，到開記者會、繼而踩上教聯會會址，一切一切都只係為咗增加知名度同曝光率，藉呢個議題不斷延續政治爭拗。到底蔡若蓮做咗乜所以唔應該做副局長？到底佢有咩咁邪惡，令到香港眾志要一力反對到底？冇架，由頭到尾都係香港眾志班人自己講架咋，實際理據？梗係拎唔出啦！

反對派反對的 是整個政府

雖然香港眾志等非建制派今次表面上係針對蔡若蓮，唔想佢做到副局長，但諗深一層，非建制派其實似係反對緊整個政府。無論係係指不滿蔡若蓮支持嘅TSA（即BCA）、國民教育或者中國歷史教育都好，呢啲其實都係政府應該推行或者會繼續推行嘅政策，如果政府唔堅定啲，畀呢班人KO蔡若蓮，咁以後政府推任何有利教育同學界嘅政策，呢班人都可以用相同方法嘗試去推倒。

為咗個人政治私利，監生將一個學歷、經驗、能力俱備嘅人描繪成惡魔，香港眾志同其他非建制派政客為咗撕裂社會，到底仲可以去到幾盡？

原圖：stheadline