近日社會因為「一地兩檢」又開始討論高鐵嘅問題，坊間有意見怕內地海關人員喺香港高鐵邊檢區執法，講到好似如果實行「一地兩檢」，內地執法人員就可以喺香港邊檢區外拉人咁。廣男覺得呢啲說法，好似用緊一啲想像嘅情況，嚟將「一地兩檢」判死刑，完全係捕捉部分港人排斥內地嘅心理。排除坊間種種歧見，廣男想問下大家有冇搭過高鐵，知唔知高鐵方唔方便？廣男就搭過，真係搭過高鐵喇！

數小時由深圳直達北京

大約兩年前，廣男參加一個去北京嘅團，有幸由深圳搭高鐵直達北京，車程大約需要八個鐘，當時就諗，要坐成八、九個鐘高鐵先到北京，喺列車上面會唔會悶死架？坐上列車無耐，唔單止可以同朋友們對住坐，一邊傾計一邊睇風景，而且坐高鐵亦冇坐飛機果種會因為氣壓而搞到個人唔舒服果種感覺，途中仲有朋友玩Time-lapse拍攝風景。自從果次開始，廣男就對高鐵心生好感。

喺同一個旅程，廣男又由北京坐高鐵去上海，再由上海坐高鐵番深圳。由北京坐高鐵去上海，又係幾個鐘嘅事，喺列車食個飯、瞓過小覺再同朋友傾下計，又一程車，比起坐飛機要先兩個鐘到機場，等上機又落機再搞一輪，高鐵喺呢啲中短程距離真係有好大優勢。如果要用香港一種交通工具比擬坐高鐵嘅舒適感，廣男覺得最似就係坐機場快線，兩者都係咁舒服，旅程間睇下風景睇下書等，其實真係好寫意。

直通車難以跟高鐵比較

有人將直通車同高鐵比較，話直通車只係比高鐵慢少少，質疑點解要起高鐵。如果單純用車程計，搭高鐵同直通車去廣州可能只係差大約一個鐘車程，但廣男想講，兩者嘅舒適度根本唔可以比較，因為廣男坐過嘅直通車，都唔知係幾多年前嘅設計，好難同高鐵比較。再者，高鐵貫穿香港同國內十幾個主要城市，如果由香港坐高鐵去北京要九個鐘至十個鐘，坐直通車要成二十幾個鐘甚至三十個鐘，時間上高鐵已經好大優勢。

只要搭過直通車上北京，就好可能會有一種感覺，就係點解「瞓完又醒，醒完又瞓」，等極都好似未到北京咁嘅。如以車程時間比較，高鐵未必贏到飛機，但綜合舒適度、便捷程度，廣男都覺得高鐵係一個相當唔錯嘅選擇。

「兩地兩檢」非不能 實難為也

當坊間不斷講「兩地兩檢」其實冇乜問題嘅時候，廣男用平常角度睇，會覺得「兩地兩檢」唔係唔得，係好難做，點解？如果高鐵好似去廣州、上海或者北京嘅直通車咁，得三、四個終點站，要做「兩地兩檢」或者仲可行。但如果高鐵可以去到國內十幾個城市，甚至幾十個地點，大家認為內地有冇可能因應香港需要喺咁多站都設立邊檢站呢？廣男覺得就難啲喇！

咁如果照行「兩地兩檢」，而高鐵由香港出發，去到深圳畀內地海關檢完再出發又如何呢？呢個方法技術上當然得，不過係慢咁解啫。明明可以喺一個地方可以做晒嘅事，又要喺深圳停車果時仲要喺深圳再做入境手續，用多一段時間喺車程上面會唔會又令高鐵失去部分優勢先？

的而且確，廣男之所以對高鐵咁有好感，可能係因為廣男喺深圳出發搭高鐵果時根本唔駛過邊境，所以先覺得咁方便咁快；同理，如果你要廣男喺香港搭高鐵時搞出境手續，去到深圳先再搞入境手續，唔單止時間長咗，心理上都覺得麻煩啦！當大家討論「一地兩檢」嘅時候，其實除咗法律問題，最應該回歸根本，諗下點樣先係最方便市民嘛。

原圖：Takungpao