近年「港獨」歪風湧現，有關論述、思潮入侵校園，搞到好多唔清楚、唔識歷史嘅學生哥，跟住啲政客盲反政府，慢慢更加走上「港獨」歪路添。噚日睇電視，見到新一任港大學生會會長黃政鍀聲稱自己「唔覺得自己係一個中國人」，仲話「中國係自己想出來」，即刻嚇到成個人彈起，你唔認中國人係你嘅事，但竟然發展到「中國」都係「想像」出嚟？唔係啩？

黃政鍀才是幻想太多

老實講，呢個「中國係自己諗出嚟」嘅概念，真係非常之「獨特」，仲非常有「創意」添。之前啲「港獨」派話要爭取獨立，都唔會話中國係唔存在，最多都係要同國家切割啫；今日黃政鍀竟然發展到話「中國」都係「自己諗出嚟」嘅，想話佢唔係走火入魔都唔得。

嗱，其實唔使講太多，廣男舉一個例子已經可以KO你黃政鍀。你話「中國係諗出嚟」吖嘛，得，咁唔該你睇睇自己張身份證，背面個區徽有冇寫住「中華人民共和國香港特別行政區」呀？有的話，咁「中國」又點會係「自己想出來」先？醒少少啦，天才！

連日本點解過新年都唔識 港大會長真犀利

仲有仲有，黃政鍀為咗支持自己想法，即係「香港人只係『覺得』自己係中國人，『實際』唔係中國人」，竟然連小學生都不如嘅論證都舉出嚟，廣男真係替今日部份香港嘅大學生感到悲哀。黃政鍀話喎，之所以有香港人「覺得」自己係中國人，係因為香港會過新年、講孔子，但係亞洲好多地方，例如日本嘅新年都同中國有好多相似，日本都講孔子、講儒家，質疑唔通日本人都係中國人咩。

唉，呢啲論述咪就係低水平囉，香港大學嘅學生喎！中國有五千年嘅歷史文化，日本同埋好多亞洲國家自古以來都受到中國文化嘅薰陶，呢個就係點解好多亞洲國家都會有過新年嘅傳統，日本人都過新年，正好印證咗中國並唔係「自己諗出來的」，黃政鍀想搞「港獨」，唔該水平都高返少少得唔得呀，大佬。

「港大」可能都係諗出來的

仲有，就算唔講身份認同問題，黃政鍀以「港大學生會會長」身份出席電視節目討論議題，其實佢有冇諗過，香港大學都係用緊政府資助，屬於中華人民共和國香港特別行政區嘅一間公立大學，咁唔通香港大學嘅法定地位、攞嘅公帑都係「自己想出來」？既然覺得一切都係「假」，咁麻煩黃政鍀將來就算畢到業，都唔好持港大個學位喇，反正呢間大學都係幻想出嚟之嘛！

老老實實，喺黃政鍀眼中，覺得教中史等同「洗腦」，但其實一直喺度用歪理洗緊人腦嘅，乜唔係你哋呢班不顧現實嘅「港獨」派咩？你班人連中國係「自己諗出來的」都講得出喎，咁將來仲有咩做唔出呀？各位家長，請留意子女有冇同呢班人接觸添呀。

原圖：RTHK