民主黨立法會議員林卓廷呢個「前廉署初級職員」，從政之後日日扮晒廉政專家，習慣抽盡廉署水嘅佢，經常性其身不正，除咗公開不知來源同真偽嘅廉署料外，仲成日疑似洩密，公布廉署調查中嘅個案內容，行為認真唔要得！呢個「扮專家」今日又發作喇，喺特首梁振英最後一次出席立法會答問會時，無啦啦又話梁振英正被「反貪部門調查」。首先，呢個訊息唔知真定假，其次係，如果真的話，佢就係公然洩密，行為操守簡直只可以用「不堪入目」四個字去形容。

自編自導自演 林卓廷只想政治攻訐

話說今日答問會，非建制派盲反派唔單止唔做有建設性嘅事，仲不斷趁機會搞政治炒作，係都要咬住已經澄清、解釋、交代、完全冇CASE可言嘅「UGL事件」嚟玩嘢。其中，對「UGL事件」已經有既定立場，處事同樣絕不公允嘅林卓廷喺會上無啦啦對梁振英話，「咁香港嘅反貪部門查緊你，係咪即係你有問題呀？」

林卓廷公然將廉署「有可能」查緊嘅案擺上檯面作政治攻訐，用心可以話係十分惡毒，佢身為「UGL事件」嘅舉報人、又加入立法會「調查UGL委員會」，今日仲喺立法會特首答問會上疑似爆料，成件「UGL事件」仲唔係林卓廷玩晒？根本就係「自編、自導、自演」啦，林卓角咁勁，唔好做議員喇，走入電影圈啦，最佳導演都有得你做呀。

廉署有冇查梁振英 外界無從證實

老老實實，反貪部門，即係廉署啦，係唔係查緊梁振英，外界根本無從證實，廉署方面亦唔會回應。咁就當真係「查緊」，但其實又點呢？香港一向係「無罪推定」的嘛，「查緊」從來唔代表受查人士有違法，更加唔代表有罪喎，林卓廷等一班反對派人士，成日話廉署「查緊」梁振英，將之營造成梁振英「有問題」嘅公眾形象，其實一啲都唔公道，亦有違「公義」原則。

林卓廷有特權 不怕《防賄條例》？

再講，如果廉署真係「查緊」梁振英，林卓廷咁樣公開透露案件內容，其實已經違反咗法律同公義原則。其實心水清嘅市民都知道啦，《防止賄賂條例》基本上係嚴禁任何人士公開透露廉署正進行調查嘅案件內容架，之所以有呢條法例，據真正嘅前廉署高層所講，目的有兩個，其中係為免走漏風聲，令到受查人士有機會毀滅證據、二來係因為廉署開FILE查案門檻唔算高，要保密嘅理由就係要保護受查者名譽，因為廉署都認同，「受查」其實唔代表乜嘢，隨時可以冇CASE結案。

不過咁，廣男喺度唔會話林卓角犯法，可能因為佢以為係喺立法會會議上「爆料」，根據《基本法》呢類言論係有「免死金牌」嘅，所以佢喜歡誹謗又好、爆料又好，被佢老屈嘅人亦奈佢唔何。不過係唔係咁呢？真係要問問法律意見先至知喇，大家而家唯一清楚見到，係有啲立法會議員自恃有特權，但係身為有公權力嘅人，竟然利用呢項特權疑似誹謗政敵，或者迴避《防賄條例》嘅法律責任，香港市民查實係唔係都應該問問，立法會議員應唔應該咁樣用「特權」呢？

圖片來源：香港電台即時新聞