時任「雙學」成員黃之鋒、周永康同羅冠聰因為喺2014年9月26日煽動學生衝入政府總部東翼前地，早前被判非法集結等罪成，分別被判社會服務令或緩刑，本來三人早前就定罪提出上訴，但日前佢哋決定放棄上訴。黃之鋒喺回覆傳媒查詢時，話希望批評違法佔領搞手同學生唔肯承擔罪責嘅人明白，佢哋已經被定罪同負上刑責喎！咪住先，9月26日黃之鋒佢哋叫人衝入政總單嘢找咗數，但違法佔領條「大數」黃之鋒仲未找架喎！

黃之鋒角色 豈止衝入公民廣場

廣男覺得，黃之鋒話自己已經「負上刑責」，其實只係承擔咗佢罪行嘅部分罪責，大家都知道，黃之鋒佢哋喺9月26日叫人衝入政總之後，戴耀廷喺9月28日宣布違法佔領正式啟動。黃之鋒等人因為9月26日嘅非法集結而被定罪，但成個違法佔領嘅關鍵時期，係9月28日開始持續79日嘅佔領行動，期間社會、民生、經濟以至市民生活大受影響，而黃之鋒等「雙學」成員被認為係指揮「大台」嘅骨幹成員，黃之鋒佢哋係咪要承擔埋違法佔領呢條「大數」先？

要找數 就要找埋違法佔領條「大數」

衝入政總被告非法集結，同搞違法佔領而被告《公眾妨擾罪》，兩者係差好遠嘅，戴耀廷佢哋而家畀人告緊嘅《公眾妨擾罪》，最高刑罪係監禁七年，而家黃之鋒話自己因為衝入政總被判社會服務令，已經負上刑責，有冇咁便宜先？嗱，如果黃之鋒話自己會承擔罪責，廣男想問一句，如果佢同其他「雙學」成員被告《公眾妨擾罪》，佢哋係咪都會承擔罪責呢？必須搞清楚，衝入政總同違法佔領係兩單案件，黃之鋒如果找晒兩條數，先至係「真找數」！

有傳媒報道，除咗戴耀廷等9人，黃之鋒、岑敖暉同埋《壹傳媒》創辦人黎智英等39人都可能將被告《公眾妨擾罪》，廣男唔知有關消息係咪屬實，但廣男想提醒呢班要「公民抗命」、「違法達義」嘅民主派人士，當初你哋講到明要「違法達義」，如果被告就應該完成「公民抗命」嘅最後一步，即係承擔罪責！希望佢哋到時唔會一邊扮正義，一邊又歪曲是非，老屈政府「政治打壓」啦！

原圖：Takungpao