立法會正審議有關財政預算案嘅《2017年撥款條例草案》，可能因為社會較關注其他新聞，冇留意到非建制派一直喺立法會「拉布」，繼之前佢哋提出多項修訂同點人數之後，佢哋近期嘅修訂則鍾情喺削減政府各部門嘅開支，有關修訂合唔合理，公眾當然可以討論，但佢哋連醫療部門、警隊等開支都要削減，廣男就有啲保留喇！

本港治安有賴警隊維持

可能非建制派由違法佔領事件開始就對警隊有偏見，所以佢哋以至個別媒體經常針對警隊，但廣男希望大家認清一個事實，香港喺全球嚟講係一個犯罪率低、破案率高嘅地方，根據「世界經濟論壇」對136個國家、地區進行調查後公布嘅最新報告，香港喺「2017世界最安全目的地」排行榜排第5名，香港能夠成為全球罪案率最低的地區之一，警隊嘅努力點可以抹煞？

廣男開頭唔明白，點解非建制派要事事「拉布」，創科局要拉、新界東北前期撥款要拉、公屋項目要拉，甚至連《財政預算案》都要拉一輪，佢哋無可能唔知道，無論係長者生活津貼「加碼」，抑或係舒緩中產、基層生活嘅「派糖」措施，其實都要喺有關撥款通過；廣男諗咗好耐，覺得佢哋未必一心想「拉死」撥款，而係想話畀佢哋嘅激進選民聽，佢哋係「做緊嘢」架！

不能以「食花生」態度看待拉布

對於立法會「拉布」嘅問題，廣男知道社會大眾未必好關心，但廣男希望大家唔好用「食花生」嘅態度對待「拉布」，因為議案、撥款被拖延甚至拉倒，最受影響嘅其實係我哋呢啲普羅市民。好似立法會工務小組咁，廣男睇新聞見到工務小組之前開咗幾個月會，先可以過到一個有關公屋工程嘅撥款，之後牽涉到幾千項民生工程嘅「基本工程儲備基金」，又畀非建制派「拉布」、拖延；試想一下，如果有關學校建設、行人通道、山泥傾瀉、渠務甚至石牆風險緩減等工程最後因為拖延而出意外，邊個會受害呢？

非建制派喺立法會「拉布」變成風氣，唔單止係因為有班激進議員要以激進方式「吸引」支持者「眼球」，市民大眾嘅沉默，其實都喺度助長緊「拉布」歪風；如果唔想議會喺未來幾年一直被激進派騎劫，其實大家都要行出嚟「Say No」！

原圖：Takungpao