游蕙禎呢個人，由上年九月講到而家，其實廣男都講到有少少悶，唔係好想再講呢個宣誓辱華，但又死唔認錯嘅本土政棍；但近日見到佢喺Facebook嘅發文，廣男真係忍唔住要再寫下佢。事關佢喺幾個社運人士因為反釋法遊行而「佔領西環」被捕後發帖，話「推動人民上街抗議從來只有暴政」，講到自己同其他涉嫌違法嘅人冇錯咁，究竟佢知唔知道，上街遊行同係咪可以衝擊警方，係完全兩回事嚟喎！

扭曲概念 為違法行為塗脂抹粉

有示威者反對釋法，當然有權上街示威、遊行同抗議啦，但廣男希望游蕙禎唔好搞錯，可以上街遊行，唔代表可以衝擊警方。當日班社運人士參加反釋法遊行嘅時候，多次偏離原定遊行路線，又衝擊警方、企圖佔領馬路，所作所為已經唔係合法集會同示威，警方拘捕佢哋，先至係維護法治嘅表現。真真正正破壞香港法治嘅，係呢班疑犯！

至於游蕙禎所講嘅「暴政」，其實廣男都唔係好清楚佢所謂何事。如果佢話法庭判佢同梁頌恆失去議員資格係「暴政」，事實好似係佢哋兩個違反《基本法》、《宣誓及聲明條例》在先，法庭依法判兩人冇咗議員資格，真係唔知「暴」從何來？如果游蕙禎話人大常委會釋法係「暴政」，咁明明係佢同梁頌恆喺立法會宣誓嘅時候拒絕誓言、宣揚港獨，先搞到人大常委會要行使釋法權力，係咪佢同梁頌恆先係粗「暴」，搞到滿城風雨呢？

「佔領西環」就是因梁、游而起

游蕙禎為參加反釋法遊行而「佔領西環」嘅社運人士發聲，廣男真心覺得如果唔係佢同梁頌恆係宣誓嘅時候玩嘢，辱華、「宣獨」又講粗口，之後法庭唔會有DQ案，亦唔會有人大釋法呢件事，真正破壞社會安寧嘅人，根本就係佢同梁頌恆！

當非建制派成日開口埋口講法治嘅時候，廣男認為佢哋好多時都係自相矛盾，當呢班非建制派人士有不滿嘅時候，就高舉要守護香港法治嘅口號；但到咗自己涉嫌違法嘅時候，法治就好似變得一啲都唔重要，甚至執法部門依法辦事都會「變成」政治打壓。呢班非建制派最討厭嘅唔係敢做唔敢認，而係唔認罪之餘仲想屈番執法者轉頭，根本就係十級無恥！

原圖：Takungpao