近日梁頌恆、游蕙禎因為衝擊立法會被捕，香港眾志林淳軒、社民連吳文遠等又因為上年「佔領西環」被捕，各界焦點都集中喺呢啲衝擊案件上；廣男作為一個關心社會嘅80後，當然都關心呢啲案件，但近期仲有一單議會新聞其實都好值得大家留意。立法會噚日繼續審議今年財政預算案，非建制派繼提出多項修訂之後，又用「點人數」形式「拉布」，如果有關《草案》喺五月底都通過唔到，隨時影響公共服務，好多今年施政報告提出嗰啲惠民措施都唔可以落實，受影響市民不計其數！

梁國雄只係口講民生？

近年，立法會討論財政預算案，一眾聲稱支持全民退休保障者，好似社民連「長毛」梁國雄都會喺財政預算案審議期間瘋狂「拉布」。先唔講全民退休保障涉及政府長遠開支，唔少經濟學者都已經先後指出，如果實行「不論貧富」全民退休保障，政府好快就會入不敷支，繼而負債千、萬億計。

好啦，就當廣男唔反對全民退休保障，但每年去到呢個時候其實都有一個好大嘅質疑；梁國雄聲稱為基層市民爭取福利，但用嘅手段就以關係到成個社會運作嘅財政預算案做「籌碼」，用可能損害民生嘅手段爭取民生，乜咁樣冇矛盾咩？美其名向政府施壓，實則令到普羅市民受苦受害，呢種行為簡直就係瘋狂。

福利、教育及體育撥款全受阻

「拉布」影響到大家啲乜呀？最直接當然係今年《施政報告》同財政預算案提出嘅多項惠民政策，包括加強版長者生活津貼、「派糖」、稅務寬免、免費幼稚園教育、撥款支援體育發展、增撥資源照顧長者同殘疾人士等等，全部關乎民生福祉嘅好嘢都被拖延，話就話「拉布為民生」，實質阻撓香港市民受惠於新措施，呢個咪就係「拉布」嘅真面目囉！

非建制派一計不成 又生一計

「拉布」已經唔係第一年，講真吖，今年「長毛」就提出咗約500項修正案，不過因為內容「瑣屑無聊」，結果畀立法會主席梁君彥刪剩28項，至於另一「拉布」主力人民力量就被Kill剩45項修正案。為咗防止非建制派議員「拉布」，梁君彥亦為議程「劃線」，預留60小時完成《草案》審議，講真都已經算到好盡；不過咁，你有張良計，我有過牆梯，非建制派噚日開始就改用「亂點人數」形式「拉布」，單單係噚日就點咗8次人數。

其實根本財政司司長陳茂波提供嘅數字，過去四個財政年度，通過《草案》嘅時間平均需要16個會議日，比1997年後歷年平均所需時間多出6倍；最大鑊嘅係，如果五月底都唔能夠通過《草案》，政府各部門可能會陸續出現資源不足，公共服務就難以維持。換句話講，如果《草案》唔能夠通過，最嚴重嘅後果係政府冇錢用，公共服務陷入停頓！非建制派，收手啦，唔好再「拉布害民生」，香港真係輸唔起架喇，你哋做做好心，放過香港啦！

原圖：Takungpao