所謂「一樣米養百樣人」，呢個世界有啲人永遠都係政治冷感，對時事政治漠不關心；但有啲人呢，就好熱愛政治，甚至有事冇事都要出嚟搞局，想做「共主」。今次講邊個？梗係近年成日出嚟搞風搞雨嘅「佔領疑犯」戴耀廷啦，呢個「創作力量同幻想，會嚇你一跳」嘅法律學者，最近又有新猷，話「民主300+」有機會變成「民主500+」，到時除非特首由選舉產生改為協商產生，否則中央、港府一定要改革特首選舉制度喎。戴耀廷講嘅嘢，永遠都咁有「創意」，廣男真係配服得五體投地。

「違佔」未找數 又為港添亂？

根據「智慧高超」嘅戴耀廷分析，佢話如果「民主300+」要變成喺特首選委選舉入面坐擁超過500席嘅「民主500+」，除咗要盡攬專業界別等選委議席之外，最大機會係喺「港九各區議會」同「新界各區議會」兩個組別入面搶選委議席，前提就係要喺港九各區議會同新界各區議會選舉入面贏到過半區議會議席，仲話呢個目標係唔容易做到，但如果做到民主派選委就會大增咁話。

對於「民主300+」可唔可以變成「民主500+」，廣男就好難評論喇，始終選舉都會出現變數，民主派可唔可以喺區議會突圍最快都要幾年後先知，不過戴耀廷又走出嚟搞搞震，廣男就覺得有問題喇！所謂「舊債未清，新債免問」，戴耀廷等人喺2014年發起違法佔領，搞到香港足足亂咗近80日，佢到而家都未承擔罪責，仲聲稱要考慮認唔認罪，同當初自己講嘅「違法達義」、「會承擔罪責」根本係兩回事！仲有，佢同「佔領三人組」其餘兩子唔係講過會公開「違佔」帳目嘅咩？罪責又未承擔，帳目又未公開，仲想出嚟搞搞震？如果我係民主派人士真係睬佢都傻！

「民主300+」也不民主

唔好講到「民主500+」咁遠吖，講返戴耀廷佢哋之前嗰個「民主300+」本身都完全唔民主啦，當初又話要反「8.31框架」、「23條立法」等等，結果呢？結果「民主300+」最後係冇支持到理念、政綱同佢哋最相近嘅胡國興，搞到胡國興被呃入閘後拎得21票，呢班自稱支持民主嘅人，就一窩蜂投票畀支持「8.31框架」、「23條立法」嘅曾俊華。民主？原則？認真就輸了！

今次戴耀廷提出「民主300+」可以靠搶攻區議會議席，講到底其實都係要幫非建制派作選舉動員同催票啫，出發點完全自私兼唔偉大，所謂變成「民主500+」，根本就係戴耀廷一心想做「共主」，無論係「違法佔領」又好、「雷動計劃」又好，又或者「特首民間投票」都好，戴耀廷搞咁多行動出嚟，最終都係想提高個人聲望，希望做到「指點江山」同民主派「共主」嘅角色之嘛。

不過咁，戴耀廷身為「佔領疑犯」，廣男真係要好認真問一句：「違法佔領單案，你會唔會真找數、承擔罪責？」相信好多市民都好想知囉！

原圖：takungpao