喺眾多非建制派嘅議員當中，廣男真係對鄭松泰（泰博）特别留意，皆因佢有博士銜頭，又係社會學學者，但係佢一開聲就令人好失望囉，例如日前喺立法會財委會討論緊財政預算案嘅時候，鄭松泰就話近三萬警察有一半去咗警察大會，質疑警隊係咪有冗員咁話？離晒題都算，數據同事實都未搞清楚，就想質疑其他人，剛剛交完稅嘅廣男，立即諗到自己交稅養埋呢啲人，覺得好唔抵囉！

警方內部評估 約二至三千名現役警員參與

鄭松泰「又要威又要戴頭盔」嘅個性出晒名，所以佢喺話警隊有半數警員「唔使返工」去參加大會嘅時候，都強調係根據傳媒報道。但廣男睇番今日嘅新聞，警方內部評估只有約2,000至3,000名「現役休班警員」參與大會，呢個數同鄭松泰講嘅爭得好遠，唔好講作為立法會議員講嘢要負責任，鄭松泰身為學者，連少少求證、求真嘅精神都冇？失敗！

再者，鄭松泰知唔知冗員係點解呢？如果有好多警察番緊工，但冇嘢做蛇王去咗集會，但又唔影響警隊工作同部門運作喎，咁呢個情況下，的確可以話參加者係冗員，但休班警察用「私人時間」參與番警察組織嘅大會，關冗員咩事呢？

鄭松泰才是立法會「冗員」吧

如果要講冗員，廣男覺得鄭松泰先係立法會嘅一大「冗員」，開會無時正經、成日離題都算，無嘢做又要搵嘢做，之前仲試過喺立法會會議暫停期間，擅自離座就走去建制派議員啲位度「倒插國旗」，搞到畀人提出譴責動議、成立委員會調查事件。不過畀人譴責都未算樣衰，鄭松泰仲要去信「成日畀佢鬧」嘅其他非建制派議員，「懇請」佢哋喺譴責動議投反對票，引用民主黨許智峯嘅講法，「原來鄭松泰都有需要泛民的時候」！

對於鄭松泰嘅本土派或者激進派支持者嚟講，投票選鄭松泰入立法會，某程度上都係想睇佢玩嘢，睇佢點玩政府；不過睇番佢近呢幾個月嘅表現，呢位博士喺立法會似係「丟架」多啲囉。選民要支持鄭松泰？當然可以，不過鄭松泰選到立法會之後就話要「全面撤出社會運動」，即係攞完選票就同社運人士分道揚鑣，佢好似係想搵份「筍工」多過服務社群囉！睇到佢同埋唔少非建制派議員開會玩下嘢、搞下事就行咗去，其實應該唔係太多嘢做，係真正嘅冗員囉！

原圖：無綫新聞截圖