以前啲人話，香港遊行示威好和平，示威者好克制，唔會亂嚟。呢種說法，廣男以前都信架，不過自從舊年「旺角暴動」後，真係冇辦法再認同。最近，有消息指警隊計劃購買射程有50米嘅橡膠子彈，消息一出，自然引嚟包庇暴徒嘅政客反彈，其中全立法會最資深嘅議員民主黨涂謹申就批評，遠距離嘅橡膠子彈好難掌握，容易有「誤判」咁話；佢仲為暴走辯護呀，話比起外國，香港嘅暴力示威情況算好少，香港算係「幾好」喎！講真，廣男對涂謹申嘅說法真係幾失望，當香港人對「旺角暴動」暴徒掟磚同縱火嘅事仍然歷歷在目嘅時候，作為最資深議員竟然作出呢啲評論，你話點可以唔令人失望吖。

裝備「備而不用」是常識

涂謹申其中一個質疑香港警察添置裝備嘅理據，就係相比外國嘅示威，香港暴力場面其實「少好多」。廣男唔否認，但「少好多」係唔係代表唔使增加裝備呢？兩者其實冇必然關係架喎；舉個例吖，乜而家香港日日發生衝天大火災咩？唔係吖嘛，咁係唔係代表香港消防處唔需要有最精良嘅裝備吖？涂謹申你回應吓吖！

同一道理，香港警察新增防暴裝備，由法例到歷史都話畀市民知，大部份情況都係「備而不用」，亦冇可能亂用。今日或者天下太平，但作為維持社會秩序嘅紀律部隊，冇可能唔居安思危，咁試問增添返一啲相應嘅裝備又有咩問題呢？可能會有人問，橡膠子彈呀、水砲車呀咁，會唔會太誇張呀？廣男大膽講句：「一啲都唔誇！」。乜大家唔記得，單係一場「旺角暴動」，已經令到90名警員受傷，係90名呀！

應對暴力示威者也要國際標準？

一名警長被磚掟到頭破血流嘅畫面，相信唔少市民都記憶猶新，仲有一幕幕暴徒追打交通警察嘅場面；用磚頭、竹枝、垃圾桶、路牌襲警嘅場面，涂謹申係睇唔到定詐唔知？非建制派成日將「國際標準」掛口邊，咁到底佢哋又支唔支持香港警察用國際標準嘅武力去應付大型示威呢？美國警察用幾大武力對付「佔領」嘅示威者、英國騎警對付暴徒時，拎住警棍大大力扑落去，涂謹申係唔係想見到咁？講到明先，廣男就唔想見到喇！

面對示威抗爭手法愈來愈激進，執法部門相應調高應對力度，根本就正常不過。仍然係嗰句，暴力示威場面「較少」，唔代表冇必要加強防暴裝備，示威者嘅安全當然要顧，但其他市民同警察嘅安全亦唔可能忽略囉！
涂謹申作為立法會最資深嘅議員，市民期望佢啲言論可以公道返少少，可惜近年佢發表維護「自己友」嘅言論時，不時都幾偏頗架；好似嗰時「青年新政」梁頌恆、游蕙禎宣誓辱華、忽略誓詞咁，佢就話「青年新政」只係以「輕鬆、幽默」嘅方式宣誓，而今次講到警察裝備時又依然唔肯公允評論，香港最資深立法會議員嘅表現竟然咁衰，廣男真係醜到想搵窿捐囉！

原圖：RTHK