近日，香港眾志秘書長黃之鋒喺佢「面書」（Facebook）發帖，話自己去咗英國交流，又再展開佢嘅「巡迴唱衰」香港之旅。雖然黃之鋒好似仲係一個學生哥，但就成日就「飛」，一時去美國鬧香港，一時又去台灣同「台獨」勢力交流。今次佢嚟到英國，梗係繼續佢一貫嘅作風，喺英國人面前唱香港啦，不過同佢會過面嘅前港督衛奕信好似唔係好信佢，仲問佢哋做乜否決政改方案喎！

其實黃之鋒今次去英國都「幾威威」架，除咗見到前港督衛奕信之外，仲連另一名前港督彭定康都同佢見面，黃之鋒仲話彭定康同佢講「I am the past, you are the future」，言下之意好似同黃之鋒講佢就係香港嘅「未來」，不過亦都有網友話，彭定康意思可以解作「我已經係過去，你嘅事關我咩事」咁解；如果彭定康嘅意思係後者，咁彭定康嘅語言藝術造詣都真係好高下！

衛奕信質疑非建制否決政改方案

講番黃之鋒同衛奕信嘅會面，黃之鋒話衛奕信好關心香港嘅政治情況，咁衛奕信係咪完全buy黃之鋒果套呢？又好似唔係喎，因為衛奕信仍然好關注香港嘅政制同民主發展，仲「主動詢問」佢哋非建制派有咩理據否決政改方案。以黃之鋒嘅「逢事必反」嘅作風，梗係話提名委員會諸多不是啦，但唔知佢有冇講到，如果通過政改，500萬市民而家可以「一人一票」選特首，香港民主進程可以行前一大步，而家香港人就「得個桔」呢？

根據黃之鋒嘅引述，佢仲話衛奕信好關注立法會議員被司法覆核，被入稟要求取消議員資格一案，黃之鋒喺回答嘅時候講得相當有技巧，話羅冠聰唔係主張港獨，又已經完整宣讀誓詞，被司法覆核係政府嘅「政治清算」喎！咪住先，廣男想問黃之鋒，羅冠聰讀晒成份誓詞，但將「共和國」讀成「共和國？」咁，宣誓有冇改變到誓詞內容先，將陳述句變做問句都得？咁仲要宣誓嚟做咩呢？
無論喺英國好、香港也好，黃之鋒都有佢言論自由，佢都有權批評特區政府；但係咁喎，如果去到邊度批評香港時政嘅時候都以偏概全，甚至係歪曲事實，咁就有問題喇！非建制派否決普選就「正義凜然」，到政府依法提出司法覆核就變「政治清算」，呢種「公我贏，字你輸」嘅作風，真係好「屈機」囉！

喺2014年違法佔領行動期間，衛奕信喺英國上議院發言嘅時候，都講過如果2017政改方案唔能夠通過，特首選舉辦法將原地踏步，香港亦將錯失一個政制向前邁步嘅重要機會。所以呢，衛奕信咁樣質疑黃之鋒，都係有跡可尋嘅。

原圖：takungpao