旺角暴動一周年，喺呢個嚴重暴行發生剛好一年嘅日子，自然就有人再總結事件架啦！非建制派講到件事因為警方而起咁，預咗，但係香港眾志話交通警向天鳴槍示警，所以先令示威者情緒一發不可收拾，真係超過份！即係暴徒打到警察跌落地冇路退，警員被迫向天鳴槍示警，你班人調轉嚟講，屈警察引起暴亂？根本就係顛倒是非！

為何不提暴徒先攻擊食環人員？

根據香港眾志嘅講法，警方介入佢哋聲稱嘅「魚蛋革命」，令到局勢「不斷升溫」，廣男睇番相關新聞，當時食環人員畀幾十人包圍，仲有暴徒將售賣熟食嘅木頭車推向食環人員，如果講到暴徒係被迫施暴，香港眾志嘅「老屈」功力真係唔講得笑喎！至於香港眾志話警方施放胡椒噴霧，所以示威者還擊嘅說法，廣男想問，班暴徒果時有冇圍警察，有冇衝擊防線，有冇堵路先？警察一嚟到就放胡椒噴霧？係新聞直播片段中看到嘅情況完全唔同！我哋見到梁天琦、黃台仰等港獨派和其他激進本土派人士不斷向警察叫囂，大大聲要衝擊警察喎！

最令人激氣嘅，係香港眾志竟然話一個交通警向天鳴槍示警之後，「示威者」情緒一發不可收拾，最終以磚頭針對警察攻擊。嗱，事實一定要搞清楚，到底係暴徒情緒一早已經「一發不可收拾」，定係警員向天鳴槍搞到佢哋情緒「一發不可收拾」先？

警員為救同袍向天鳴槍 反被誣蔑

廣男睇番新聞片段，睇到係個交通警見到同袍畀暴徒追住嚟打，仲要係一路退仲一路打果隻，被打到昏倒在地上，仲有暴徒舉起個垃圾桶掟過去，分分鐘死人，所以先向天鳴槍示警；廣男又想問，暴徒一直追住警察嚟打，打到紅晒眼，係咪一早已經「一發不可收拾」呢？係咪交通警為救同袍向天鳴槍就有錯，暴徒由頭到尾都喺度衝擊同打人就叫「被迫」先？

根據香港眾志嘅講法，佢哋聲稱自己反暴力，但就話「衝突」係因為同警察有「新仇舊恨」，廣男必須指出，佢哋所講嘅「舊恨」，只係佢哋2014年搞違法佔領行動時警方執行職務，維持治安同執法，呢啲「舊恨」係因為佢哋違法、破壞社會在先，唔好講到自己好啱、好正義咁，唔該！

就算退一萬步，喺呢個法治社會，有什麼「新仇舊恨」也不應訴諸暴力，否則同執行私刑有咩分別？