「長毛」梁國雄宣布參選特首，聲稱要改變以往「唔投票、唔提名、唔參選」嘅立場，行出嚟聲稱要畀「大家有得揀」。梁國雄以一個不倫不類嘅「公民提名」為幌子，話參選係要揭露佢口中「小圈子」選舉嘅虛偽。廣男作為花生友，梗係歡迎梁國雄參選啦，因為如果佢有足夠提名成功入閘，到選舉論壇時肯定超級精彩啦。不過講真，其實呢啲都係廢話，當呢班人自己否決完政改之後，仲好意思親身參與特首選舉，咁無賴都做得出，作為小市民真係唔知講乜好！

一邊抹煞普選 一邊參與選舉

根據梁國雄嘅講法，佢行出嚟係因為而家四個參選人都代表唔到非建制派，行出嚟希望「大家有得揀」，又話佢哋初衷係「公民提名」。廣男一向支持唔同人參選，畀選委多一個選擇，但大家應該知道，梁國雄當年有份否決政改方案，令到全香港500萬市民唔可以「一人一票」選特首。

一邊否決普選，另一邊又自己走去參選，我哋作為市民，唔通會支持否決普選嘅佢，等佢可以到處耀武揚威，而我哋自己就得個「睇」字？

要進一步改善普選方案 應先通過政改方案

啲人成日話政治係妥協嘅藝術，從政者應該喺可能範圍下爭取到最大改變。梁國雄佢哋話要爭取「公民提名」，廣男始終唔認同只有「公民提名」先叫做普選；再者，如果梁國雄佢哋想爭取「公民提名」或者佢哋眼中可接受嘅普選方案，點解唔先通過政改方案，再逐步研究完善各種選舉辦法呢？

對於有人質疑，當日「袋咗先」政改方案，個方案就會係終局，唔可以再改動。廣男極唔同意呢種諗法，試想想，如果前年嘅政改方案通過咗，今屆唔單止係可以普選特首，2020年仲可以普選立法會添。呢種情況下，今屆行出嚟要參選特首嘅人，個個都一定要回應市民訴求，提出進一步完善選舉方式嘅方案，否則喺一人一票選舉嘅階段，市民自然唔會投票畀佢。呢種情況下，普選方案又點會「一成不變」，甚或有人口中嘅「終極方案」先？

搞政治，當然係為民服務，正因如此，政客一定要「識計數」。事實上，呢班非制派，包括梁國雄本人，佢哋計嚟計去，都剩係睇到眼前「呢條數」（激進選票），至於香港長遠點行落法？點樣先可以為香港爭取到更完善嘅普選方案，其實從來唔係非建制派考慮範圍。

今次梁國雄參選特首，你就有你玩得極興奮，我本來有一票選特首，而家變成眼白白睇住你玩，真係好「公道」囉！

原圖：大公報