新年流流，本來廣男都想輕輕鬆鬆，話晒新正頭嘛，休息吓都好吖；點知，咁啱有人轉發咗段片畀廣男，唔睇冇乜事，睇咗當堂眼火爆。做乜咁激？段片竟然羅列晒啲不盡不實嘅數據，抹黑今屆特區政府「囤地」，又話政府好多「閒置」嘅官地特登唔用，係名副其實「官商勾結」喎。吓，咁屈都得？廣男一向鍾意扒數據，等我再次踢爆呢段片嘅製作人有幾無賴啦！

政府有4千公頃地唔用？

首先，段片劈頭就話政府有4千公頃「閒置官地」日日喺度曬太陽，面積足足有60個維園咁大，只要政府肯用嚟起屋，香港自然冇房屋問題喎。老實，聽到呢個數字，唔識真心嚇一跳，識嘅話呢？得啖笑囉。

點解?因為4千公頃官地係就有喺度，不過唔至於「日日曬太陽」，而且唔可能全部用嚟起屋囉。根據政府喺2012年年中公布嘅數字，屬於政府嘅「未經批租或撥用的土地」（即係所謂嘅「閒置官地」）約有4千公頃，但被規劃作為「住宅」用途嘅就只有2,153.7公頃，其他土地一早被規劃做商業、工業、「政府、機構或社區」，同埋休憩用地。

再者，2,153.7公頃住宅用地中，扣咗道路、斜坡、簡易臨時撥地、零碎地塊，以及鄉村式發展土地後，可以用作興建住宅嘅土地只有391.5公頃！即係話4千公頃就冇喇，十份一就差唔多！講真，製作呢段片嘅人，明顯係對土地有少少認識嘅，不過可惜吖，為咗打擊政府，竟然不學無術，玩吹水抹黑，認真可惡。

大佬，香港地唔足夠就係人都知，除咗住宅外，商業、工業、「政府、機構或社區」設施，以及休憩用地全部唔夠，政府冇可能唔留地做呢啲用途囉，大家試想像吓，如果自己間屋附近，除咗樓之外，全部都係樓，冇商店、冇公園、冇社區設施，你話住唔住得呢？

除咗「閒置官地」數據有誤導，段片反反覆覆話香港有1,200公頃「棕地」，同樣話政府只要收晒呢啲「棕地」去起樓，香港就可以解決房屋問題喇！講真呢個數字同樣好值得質疑囉。

香港對「棕地」並無法定統一定義

1,200公頃「棕地」呢個數字點嚟呢？係嚟自反政府立場極之明顯嘅「本土研究社」；老老實實，佢反政府，又唔一定代表提出嘅數字唔啱，但大家又知唔知，其實香港對「棕地」係冇統一同法定定義架呢？係呀，真係冇架！

發展局曾經提過，今日香港最少有365公頃「棕地」，數字同「本土研究社」提出嘅相距極遠。由於今日香港對「棕地」係冇法定同統一嘅解釋，所以廣男亦唔敢話邊個數字最正確，唯一可以講嘅係，政府同「本土研究社」對「棕地」嘅理解似乎唔太相同，甚至唔係講緊同一樣嘢，話「棕地」有1,200公頃，暫時只可以話係「單方面」說法。

打擊政府 誰最開心？

講咗咁耐，廣男都講到口水乾，不過最後點都要講埋，除咗「棕地」面積可能冇想像中咁大之外，嗰段片同樣冇話畀你知，今日香港「棕地」嘅業權有幾分散同複雜，剩係搞「收地」，都至少搞幾年，之後仲要平整、除污、興建基礎建設同社區配套，以上種種加加埋埋，順利都要十年啦，仲唔計可能有人提出「司法覆核」呢？

都係嗰句，為咗政治目的去攻擊政府，就算最終真係畀你打擊成功都好，得益都唔會係香港升斗市民囉。政府覓唔到地、起唔到屋，最終受害係邊個？乜係你班人口中嘅高官咩？算把啦！

原圖：Wenweipo