如果大家有留意新聞，前排有班示威者衝擊中聯辦，甚至一度「佔領西環」，事隔大約兩個月，警方至今拘捕10人，當中包括「港獨自決」組織香港眾志同「暴力組織」社民連嘅成員。廣男喺度諗，呢班友仔會唔會轉頭又走嚟話係「政治打壓」呢？說時遲那時快，香港眾志黃之鋒真係走出嚟話4個立法會議員嘅司法覆核案下個月開審，今次拘捕有政治考慮，係政治報復咁話喎！查實幾日前律政司司長袁國強先講，「有恰當嘅刑事檢控」因為「有啲人有政治立場」而受到批評，轉頭黃之鋒就做出完美示範，大眾終於知道呢班人口中所謂「公義」其實就係：「嗱，我哋有冇犯法都好，你拉我哋就係政治檢控」！

袁國強指檢控工作被無理、惡意謾罵

喺幾日前嘅「法律年度開啟典禮」，袁國強除咗提到話今日香港「恰當嘅刑事檢控」畀一啲人批評，而呢啲人只係因為支持被告嘅政治立場，完全「罔顧證據同法院嘅判決」；袁國強仲引用刑事檢控專員嘅一番話，話喺一啲敏感嘅案件，有同事出庭會畀某啲市民無理、惡意、不公地謾罵，令人痛心，呢啲行為亦稱唔上係言論自由嘅恰當行使。袁國強呢番說話的確係發人深省，有啲行為明明違法，但只要被捕人士、被告同某啲人立場一致，就話係有政治考慮、政治打壓等等；廣男想問，喺呢班人眼中，係唔係有政府立場、係反政府就乜都得：「有法可以唔守，因為我反政府囉！」

好似黃之鋒咁，去銀行開戶口，銀行唔開畀佢又話自己受到治打壓，畀人拉又話政治打壓；用另一個角度講，早前幾日羅冠聰由台灣番香港喺機場被襲，被拘捕嘅人一樣係表達緊政治訴求，引用黃之鋒等人嘅邏輯，呢班襲擊羅冠聰嘅人被捕係咪又係政治打壓先？以黃之鋒佢哋「龍門任佢搬」嘅立場，相信話佢哋果啲係受到政治打壓，佢哋陣營以外嘅人被捕就「合情合理」啦（應該係）！

將「佔領西環」拉扯到被捕一事 黃之鋒邏輯混亂

根據黃之鋒嘅講法，因為4名立法會議員被DQ一案就嚟審，所以佢哋有成員因衝擊中聯辦被捕，廣男想問，兩件事必然有關係咩？一件係政府入稟嘅司法覆核案，一件係公眾地方犯法嘅刑事案；黃之鋒講到因為司法覆核案所以佢哋有成員被捕咁，根本講唔通。事實係，就算4名議員DQ案審唔審、幾時開審都好，示威者衝擊中聯辦、「佔領西環」就有可能被捕，唔該黃之鋒唔好混淆視聽！

香港有冇法治？梗係有啦！咁有冇被破壞？都有！邊個破壞？咪就係一班經常口講要守護法治，但又一邊違法、一邊屈人政治檢控，頭戴「光環」嘅民主派人士囉！

原圖：takungpao