鼓吹「偽自決，真港獨」嘅立法會議員羅冠聰、朱凱迪、姚松炎，以及「香港眾志」秘書長黃之鋒等人，日前到台灣參加由「台獨」政黨「時代力量」舉辦嘅論壇。羅冠聰由台灣返港後，喺香港機場被反對佢嘅示威者「追打」，最終要由機場保安護送離開。廣男在此必須強調，無論任何情況、對待任何人，都絕對唔可以使用暴力、唔可以行私刑，就算對方係「違法佔領」搞手、散播「港獨」言論都好，都唔應該用暴力對待佢哋。
 
反對暴力 一把不變的尺
 
廣男明白，可能有示威者覺得羅冠聰、黃之鋒等人非常之乞人憎，搞到社會「立立亂」之餘，仲數典忘祖，曲線宣傳「港獨」。但即使係咁，亦唔代表大家可以用暴力對待佢哋。大家諗下，市民最初點解對佢哋咁反感，認為佢哋係搞亂香港嘅「元凶」？咪就係因為「暴力」呢兩個字囉！
 
喺2014年9月尾，就係由羅冠聰、黃之鋒呢班人開始，以違法手段衝擊政總，揭開維持79日「違法佔領」嘅序幕，「違法佔領」有暴力，大家眼睇，好似暴力衝擊警方啦、破壞公物啦、一百人包圍三個香港警察要「搶犯」啦、違法爬上山排政治標語，令到消防員要冒險拆返落嚟等等……呀，仲有，自製武器襲擊警察、霸住條街令到旺角一帶交通接近癱瘓等等，呢啲暴行，相信大家歷歷在目。
 
當日我哋反對呢班人，正因為佢哋違法、施暴，今日我哋又點可以「打倒昨日的我」，贊同暴力行為呢？的而且確，呢班「自決派」或者「港獨派」，真係為香港製造咗好多麻煩，由「違法佔領」開始，暴力衝擊立法會、襲警、「光復」行動、旺角暴動等，「暴力」離大家愈來愈近，成日都有可能發生衝突咁。香港因為呢班人無日無之地搞暴力行為而愈來愈撕裂，唔少真心愛香港嘅人都深痛惡絕，但廣男始終覺得，我哋應該引以為戒，唔好學似呢班人咁使用暴力。
 
暴力聲音 蓋過羅、黃罪責
 
其實，今次羅冠聰、黃之鋒等人到台「播獨」先至係重點。黃之鋒話透過民生交流，可以搵到突破「中國因素」嘅方法、羅冠聰直頭話對「港獨」同「台獨」持「開放態度」；可惜，呢啲應該被譴責嘅言論，都畀示威、暴力嘅聲音蓋過。
 
或者咁講有啲武斷，但好老實，呢班「破壞派」嘅言行，本來係「會」同埋「應該」受到千夫所指，被示威者和平「狙擊」同批評亦係然，但正因為一個羅冠聰被襲，如果令佢由「施害者」變成「受害者」，你話幾唔抵呢？在法在情在理，暴力襲擊佢哋，對香港其實「百害而無一利」，大家咁聰明，一定明白呢個道理嘅。
 
原圖：wenweipo