首先，廣男必須承認，條題係有「誤導」成分嘅，因為話歡迎鄭松泰回歸「和理非」呢句說話本身係有問題嘅。何解？皆因話佢回歸「和理非」，前提就係佢之前係有用暴力嘅，但眾所周知，鄭松泰雖然表面鼓吹暴力，但實際一直都係「口就衝、做就縮」嘅典型劣質政客。正確嚟講，廣男歡迎嘅係鄭松泰身心一致，連言語上都回歸「和理非」嘅行列，講緊嘅係佢最近接受專訪，聲言自己所領導嘅組織「熱血公民」要「全面撤出」社運，積極做社區服務，你話係咪好抵讚先？

成為議員就「華麗轉身」

其實唔搞社會運動，尤其係好可能有暴力衝擊嘅社會運動，對社會嚟講梗係好事啦，不過出自鄭松泰把口就非常諷刺囉！「熱血公民」靠咩起家？咪靠暴力衝擊同粗口橫飛、人身攻擊起家囉，佢哋其中一樣撒手鐧就係不斷喪鬧傳統民主派「和理非」、做唔到嘢、「賣港」等等，感覺就好似同人講「呢班民主派冇用架喇，投我呢啲勇武抗爭嘅激進派、本土派仲好啦」，好啦，家陣鄭松泰成功晉身議會，就嚟個「華麗轉身」，同班勇武支持者講自己唔搞社運架喇，專注議會工作，之前跟佢癲嗰班，唔少已經入獄有晒案底，佢自己就清清白白，除咗寫個「服」字畀佢，都唔知講咩好！

至於身為嘅立法會議員、「熱血公民」現任主席鄭松泰就更加不知所謂，選之前幾個月先喺電視節目話「主張暴力抗爭」，但今日選到喇，竟然就話「退出社運」，哈，真係政治一日都嫌長、世事幾奇怪都有。仲有、仲有，「熱血公民」以往經常高呼要「收回」單程證審批權，「收回」之前不能投放太多福利，否則香港資源會畀「新移民」拎晒云云。哈，但唔知點解，鄭松泰做咗議員後，就喺立法會會議上大力提倡要增加綜援同福利金額，仲猛話政府「孤寒」加得少添；點呀，好混亂囉，睇唔明呀！

抗爭前提：不會被捕？

好似2014年11月尾有單示威者用鐵馬衝擊立法會大樓，事後被判囚單嘢，有目擊者話見到衝擊者打碎完立法會大樓玻璃後走去帳篷問入面嘅人「走得未」，據報帳篷中人原來「熱血公民」前領導黃洋達，不過當然啦，黃洋達「一如所料」否認！

不過咁，查實鄭松泰都唔係好好多，佢其實一早開口講到明，自己所謂抗爭，係以「不受傷、不被捕」為前提，佢真係做到架，不過係佢同一班「熱狗」領導之嘛，畀佢號召出去嗰班人呢？SORRY囉，冇人話嗰班「爛頭卒」可以「不受傷、不被捕」囉。

不過咁，無論鄭松泰同班「熱狗」言行幾咁唔一致，或者佢好似啲網民話係「走數」、「身驕肉貴，仲點勇武」都好，鄭松泰既身體「和理非」之後（剩係叫人衝又話違法前提係唔被捕），言語上都回歸到「和理非」層面，點講都係一件好事嚟嘅。至於本來投票畀佢勇武Fans選票點？怨咩吖，暴力冇市場架，呢班人最多咪怨畀人FAKE起晒囉，冇嘢架，投得「熱狗」，預咗畀人出賣架啦，係咪？

唉，反正都係，唔爭在講多一單。「熱血公民」個龍門係咁搬都唔係新鮮事，好似黃洋達，佢表面好似好抗拒內地同香港溝通，但其實原來佢之前開過港交友公司，大量撮合內地同香港嘅「兩地情緣」，呢單新聞見晒雜誌，佢自己都承認架！仲有，「熱血公民」之前話選到立法會後會搞「辭職公投」，但大家應該仲記得，佢哋未選完就已經冇左件事！

今日香港，竟然有班自以為好醒嘅人，畀「熱狗」FAKE完一次又一次都仲要信晒佢哋，咁真係無計架喎！

不過算啦，鄭松泰話「熱血公民」未來會積極做社區服務，到時大把地區「基本盤」，又未必要啲勇武Fans選票啦。鄭松泰不愧為「博士」，計數極之精確，選前咁樣講，選後又另一個講法，唔知佢下次選舉，又會唔會「再轉身」，突然呃激進票呢？不過咁，其實香港市民大部分都係溫和、理性，話唔定鄭松泰走「和理非」路線，仲多捧場客呢！

原圖：wenweipo