每逢1月1日，民陣都會發起所謂「元旦大遊行」，今年亦唔例外。大會公布今年有近萬人參加，但根據警方統計，遊行最高峰人數都係得4,800人左右。廣男咁講，唔係想借遊行人數話民陣號召唔到民眾，亦唔係話佢哋要求撤銷對4名議員嘅司法覆核完全冇人理；廣男想聚焦嘅，係民陣大大隻字高舉「主權在民」嘅旗幟，但係咪只要高舉民主旗幟，非建制派就可以唔守法，議員就可以唔依法宣誓先？

借民主旗幟 掩飾違法行為

廣男自問對於政治、民主理論嘅認識比較粗淺，但作為一個普通市民，都覺得民陣呢套「借民主幌子，掩飾違法行為」嘅做法非常有問題。佢哋口中嘅所謂「主權在民」，應該係指民眾將權力委託畀管治者或者政府，由政府依法管治社會；至於佢哋口口聲聲話唔應該司法覆核4名議員，意思大概係幾名議員由市民選出，政府唔應該要求取消佢哋嘅議員資格。表面上，佢哋嘅講法合情合理，但當中忽略咗兩個重點，第一就係將權力交託畀政府，當中包括政府執法嘅權力同埋義務；第二，就算「主權在民」也好，任何人都要守法，包括立法會議員。

攞番民陣「主權在民」嘅講法做例子，政府為人民服務係理所當然嘅事，但任何市民，包括立法會議員，都一樣要遵守法律；作為一個代議士，立法會議員應該有更高嘅守法意識，連依法宣誓嘅基本法律要求都做唔到，產生自己議員資格被撤銷嘅危機，反而掉轉槍頭指政府執法係唔啱，廣男想問當中有道理可言咩？

政府司法覆核4名議員 做法一視同仁

有人或者會質疑，之前都有立法會議員宣誓有問題都無畀人DQ，點解今次唔可以？廣男想反問，有人超速駕駛9次都無畀人捉，係咪佢第10次超速都唔應該捉？值得留意嘅係，民陣只為4名議員發聲，而唔包括梁頌恆、游蕙禎，問題在於，如果梁、游DQ係合法合理，咁政府唔司法覆核另外4名議員，係咪一視同仁、依法辦事嘅做法呢？

民陣作為非建制派嘅標誌性代表，將「主權在民」嘅口號叫到咁響亮，但佢哋似乎忽略咗社會組成當中一個極為重要嘅元素，就係無論你係邊個、咩黨派、幾buy民主都好，你都要守法，而唔係涉嫌違法仲反咬執法者一口囉，唔該！

原圖：RTHK