今時今日，要成為公眾人物真係一啲都唔容易，點解？因為而家嘅媒體生態同以往大有不同，以前你做錯嘢，啲人就會鬧你，而家呢？就算你唔係做錯嘢或者犯法，只要有啲媒體有心「做你」，一樣可以捕風捉影，用一啲唔係事實嘅報道「唱衰」你，用一句俗套嘅講法，就係「大話講一百次都會變真話」。近日，廣男又見到一啲有關特首梁振英同UGL協議嘅新聞，真係睇唔過眼，決定要再次發聲，明明係正常離職協議，就畀人係咁抹黑，屈成秘密協議咁，有啲媒體為咗對付「政敵」，真係幾無良都有！

UGL事件既非秘密協議 亦非所謂漏報

廣男份人好執著，見到一啲無理嘅抹黑，就忍唔住要出聲，你可以將大話講一百次，廣男一樣可以將真話講夠一百零一次。對於個別媒體或者別有用心嘅人依然要話UGL事件係咩秘密協議、「枱底交易」，廣男想講賣盤交易當中各方持份者都知道協議內容，連率先報道事件嘅澳洲媒體都承認事件，某程度上撤回報道，啲媒體、政客仲要「屈」落去，真係好冇品。

其實喺UGL事件上，除咗特首梁振英本人，政務司司長林鄭月娥都回應過，啲反對派係都要話特首冇申報利益，但事實係有關協議款項源於梁振英辭去戴德梁行職務，而唔係由於佢日後會提供任何服務，現行政會議成員利益申報制度冇要求就呢種離職協議要作出申報，既冇要求申報，又何來漏報呢？更何況，梁振英與UGL達成協議時，佢已經辭任咗行會而未當選特首！事實上，呢類商業安排係商業慣例，梁振英成為特首之後亦已經自動完成當中嘅「不競爭」要求，廣男質疑係某啲媒體、政客唔明白，定係佢哋明白而堅持繼續抹黑特首呢？

政客不斷抹黑 毫無道德、底線可言

至於有政棍指梁振英「須不時協助UGL推廣業務」、「擔當轉介人及顧問」等，其實梁振英自成為特首後，根本就冇為UGL提供過任何服務，而且合約亦寫明UGL提出嘅服務要「合理」、唔可以有「利益衝突」，梁振英成為特首後如果為私人機構服務肯定會有「利益衝突」，所以「顧問服務」亦可以話係自動失效。冇秘密協議、冇漏報瞞報、冇利益衝突，班政客成日話有Case，係咩Case呢？廣男認為，呢個唔係咩廉署Case，係一個抹黑、「謀殺」嘅Political Case就真！

廣男好明白，政治世界壁壘分明，各方陣營好難做到Win-Win Situation，但係批評政見唔同嘅人當然可以，但係經常將唔係事實嘅嘢用嚟抹黑其他人，將已經解釋過嘅事情繼續「描黑」，呢啲唔係理性論政嘅表現，而只係為咗攻擊政敵，而毫無道德、底線可言嘅卑劣行為。