廣男成日覺得，呢個世界「剃人頭者，人亦剃其頭」，當你以為自己惡晒乜都得，人哋一樣可以用相同方式對付你。廣男做乜無啦啦咁講？無乜特別，只係見到香港民族黨召集人陳浩天喺台灣聲稱受襲所以有感而發。老老實實，陳浩天有冇畀人打，廣男冇可能知，喺香港其實都冇乜人識佢，去到台灣反而有人走去襲擊佢？事件真係令人疑惑。廣男絕對反暴力，只係覺得如果佢真係畀人打，咁就真係諷刺喇，陳浩天本身就係暴力王一名，多次公開鼓吹使用暴力，竟然掉轉頭被暴力對待？

曾表示要選暴徒入立法會掟磚

可能大家唔係好認識陳浩天，唔緊要，等廣男話你知。此人舊年成立理大學生會「退聯」關注組，積極主張「退聯」，又創立香港民族黨，打正旗號宣揚「港獨」；之後仲想參加今屆立法會選舉，不過最後因為「港獨」立場而被裁定冇參選資格。

講到呢度，大家大概知道佢係咩人啦，不過呢啲都唔算最乞人憎，最乞人憎嘅係，宣揚「港獨」之餘，仲要走去小學派「港獨」宣傳品。你無聽錯呀，唔係大學、中學，而係去小學宣揚「港獨」。廣男真係想問，萬一真係有小朋友聽佢講去做「暴力抗爭」，佢點對住啲小朋友同家長？其實呢位狂人講嘢一向非常離譜，之前仲講過要「選幾個暴徒入去（立法會）掟下磚」，頗為崇尚暴力！

有人受暴力感召　「教訓」陳浩天？

廣男咁講可能有啲衰，但佢同佢啲同黨成日宣揚暴力革命，會唔會有意無意間，某啲人聽啲唔聽啲，以為有不滿就可以訴諸暴力呀？如果係真的話，施襲者可能都係受到陳浩天之流「感召」，認為可以用暴力解決問題喎！一啲受到自己「感召」嘅人，身體力行示範用暴力對付異己，陳浩天應該感動至係吖，做咩要去「譴責」對方呢？

必須強調，廣男絕對唔贊成使用暴力，寫陳浩天亦唔係純粹想笑佢雙重標準，而係想帶出「己所不欲，勿施於人」嘅道理；陳浩天唔想受到暴力對待，咁佢又何必一直宣揚暴力，叫人用暴力對付其他人？將心比己，你哋叫人掟磚可能覺得好開心，但如果你哋係畀人掟磚果個又有咩感受先？

原圖：RTHK