近年香港出現一陣陣「怨氣」，有人成日話「香港玩完喇」、「要走喇」等等，廣男作為80後，身邊總有啲朋友話要移民，甚至反問廣男「乜你冇呢種諗法咩？」。坦白講，廣男真係冇呢種諗法，因為廣男一直好清晰，就係外地好多地方環境絕對冇香港咁好，好多人諗住「離開就會好」嘅諗法未必啱。噚日，廣男上網睇完一場論壇嘅直播後，呢種想法更加堅定。

外國不少國家負債纍纍 青年失業率高企

廣男一向關心時事同經濟，尤其係經濟發展，因為時事或者政治雖然影響我哋，但香港政制各方面穩定，啲時事新聞好多時都係爭拗或者政治爭議具多；但經濟發展關係到市民生計，偏偏好多人好似唔重視咁，真係百思不得其解。

於是噚日，廣男膽粗粗陪朋友出席一個有關社會創新、經濟發展嘅論壇，其中一個嘉賓係智庫組織「香港黃金五十」創辦人林奮強，佢講到而家環球經濟就好差，喺可見將來經濟會繼續下行，唔少外國國債驚人，有啲國家預計負債將會等於GDP嘅300%-400%，青年失業率更加係高到嚇死人，最高嘅西班牙青年失業率甚至高達54%。雖然全球經濟普遍下行嘅情況下，香港經濟增長放緩，同樣面對人口老化、勞動力下降以及撫養比率上升等問題，但另一方面，香港近年總就業人數創新高，盈餘更加係非常充足，只要做好經濟、社會基建投資，香港仲可以「迎好而上」。

論壇另一位主講嘉賓，前財政司司長梁錦松都話，歐洲人其實睇到香港幾好，全民就業、治安良好，而且有國家支持，又有良好教育同醫療制度，香港人唔應該悲觀。

有人刻意唱衰香港？

的而且確，綜觀香港現時嘅經濟環境、就業數據以至各種制度，比起外國好多地方算係相當唔錯，只要繼續發展，投放更多資源喺房屋、醫療以及基建上，加上做好科創、社創等工作，香港真係可以「迎好而上」。偏偏，呢個世界總有啲人喺度「搞局」，當經濟差，就批評政府解決唔到民生問題；當經濟一般，就話做得唔夠，可以再做好啲；但當經濟唔錯嘅時候呢？佢哋又可以話你解決唔到政制問題喎，甚至當你要進一步發展經濟、科技嘅時候，就會當你係鄭子誠咁話你有「陰謀」，總知就「全方位攻擊」，真係問你死未！

廣男講緊咩人？梗係非建制派啦，創新及科技局、版權修訂條例、基建撥款等等，實在數都數唔晒，總之就「拉布」、「拉布」再「拉布」，就係唔想香港變好之嘛！

原圖：RTHK