「青年新政」梁頌恆、游蕙禎因為拒絕誓詞、宣獨辱華畀高院裁定喪失議員資格，點知兩個死不悔改，喺唔解釋自己係咪拒絕宣誓嘅情況下提出上訴。雖然高院上訴庭仍未就案件有裁決，但一般估計二人即使上訴到終院勝算都唔大，意味新界東、九龍西好可能會有補選。近日，有媒體指佢兩個有計劃參加補選奪回議席，甚至已經落區派傳單；廣男認為，佢兩個既然已經被證明視《基本法》如無物，又何必要再次簽假聲明、發假誓爭取參選呢？

不擁護《基本法》 又何必要做因《基本法》而存在的代議士

廣男必須強調，香港特區嘅立法會議員，並唔係好似私人機構咁唔使講政治立場或者憲制責任，任何人參選立法會，參選時都必須簽署聲明擁護《基本法》以及效忠中華人民共和國香港特別行政區。梁頌恆、游蕙禎成日宣揚「港獨」，宣誓嘅時候又拒絕誓詞、侮辱華人、宣揚港獨，法院判決都證實佢兩個係唔會擁護《基本法》、效忠特區，老實講，選舉主任點都冇理由再畀佢兩個參選。

廣男唔係想鼓吹暴力，只係覺得，佢兩個既然鼓吹港獨，其實大可以做番街頭戰士，反正佢兩個根本唔會效忠特區，而係想推翻政權，一邊要違反《基本法》搞「港獨」、一邊又要進入《基本法》授權成立嘅立法會，呢個世界邊有咁便宜？

選舉主任必須依法辦事

唔知大家記唔記得，查實除咗《基本法》第104條，《立法會條例》都清楚寫明參選時要提交「擁護《基本法》和保證效忠香港特別行政區的聲明」；根據本土民主前線梁天琦等例子，梁、游更加冇可能過到選舉主任嗰關，選舉主任唔畀佢兩個參選，絕對係「依法辦事」，言行表現出不符條例嘅參選人，就唔可以、唔應該有機會參選，法例寫得非常清楚，唔係屈佢兩個架！

況且，從政治道德嘅角度考量，梁、游連自己國家、民族都可以侮辱，完全無視《基本法》甚至立法會議員嘅憲制責任，根本就冇資格成為市民嘅代議士。仲有呀，佢兩個執意唔認錯打官司，而家已經瀕臨破產邊緣，破產人士係冇資格做議員架喎，梁、游而家仲要眾籌先有錢上訴，呢種先唔顧《基本法》宣揚港獨，繼而為打籌錢官司不惜以身試法嘅政棍，唔好話做立法會議員，就算做一個普通非建制派嘅政客，都覺得佢哋言行可恥、水平低劣，仲想參加補選，面皮有冇咁厚呀？

原圖：RTHK