黃之鋒上次去泰國因為唔受歡迎被拒入境，今次又有新搞作，一連兩日去美國唱衰香港。話就話應邀去美國，不過你話要嚟，唔通趕你走咩。黃之鋒今次訪美目的，係同美國國會議員、大學教授同傳媒宣揚人大「釋法」破壞香港法治同司法獨立。不過一如所料，黃之鋒又係講啲唔講啲，查實高等法院有判決之後，家陣全香港都知道「青年新政」梁頌恆、游蕙禎兩件宣揚「港獨」、侮辱全球華人嘅人形物體先係破壞法治真凶，唔該黃之鋒唔好調轉嚟講啦！

人大常委點解要釋法？

真係講到口都臭，眾所周知，人大常委會之所以要「釋法」，全因梁、游宣誓辱華兼「播獨」。如果梁、游唔係係宣誓時做埋啲違法兼低能嘅行為，人大常委會使乜「釋法」？貪好玩咩！

兩件人形物體做過乜，廣男都唔想再講。查實法官區慶祥係判詞到講得好清楚，佢兩個宣誓內容侮辱國家及華人、嘲諷宣誓程序，行為屬於「拒絕／忽略」宣誓，簡單啲講，即係違反「宣誓條例」。香港法律寫得好清楚，違反「宣誓條例」就會取消議員資格，白紙黑字大家可以自己睇。

其次，展示「Hong Kong is not China」旗幟，唔係宣傳港獨仲可能係咩？《基本法》第一條已經寫得好清楚，香港係中華人民共和國不可分割部份。宣揚「港獨」已經係違反咗《基本法》。既然違法，點解唔可以執法？要知道國家主權同領土完整係我們中央政府既底線，面對分離份子日益猖獗，中央政府一定要用最明確同清晰既方法話畀所有人「領土完整」係不可動搖嘅立場。

老實講，如果黃之鋒話「釋法」破壞香港法治，但如果「釋法」係講清楚《基本法》條文內容，等全香港人知道「分裂國土」係違反《基本法》的話，咁點解仲係「破壞法治」呢？仲有喎，廣男都仲未講，「釋法」其實係《基本法》內容嘅一部份，即係香港法治一部份，夾硬話「釋法」破獲法治，我真係覺得好好笑囉！

黃之鋒，咁多個國家都唔歡迎你、唔畀你入境，好心你就反省吓啦。日日掛住唱衰香港、信口雌黃亂咁鬧，畀人踢爆批評就扮晒受害者咁，真係睇到就眼火爆。有事冇事走去美國乞求人哋可憐，好心唔該提啲實際建議，點樣可以搞好香港，唔好好似你咁指鹿為馬、斷章取義！黃之鋒走去美國告狀，可惜吖，美國從來只係為自己利益做事，對付叛國者仲一啲都唔手軟添！廣男相信，如果美國國會議員係宣誓時公然表明分裂美國國土、同用粗口辱罵國家，佢嘅下場一定比梁、游更嚴重，未必只係畀人褫奪議席咁簡單囉！

原圖：RTHK, wshfzxx