民主黨許智峯日前喺立法會要求休會辯論釋法問題，但據悉在大會前內會已經傾過並冇人要求加會或加時傾，主席梁君彥因此拒絕許智峯，但係許仍然唔守規矩不斷發言，被下令離開會議廳時又唔肯走，跟住一批非建制議員「一擁而上」造成混亂，結果會議「又」被迫暫停。見到呢啲場面，廣男覺得一啲都唔出奇，不過，擾亂議會秩序嘅係民主黨議員，廣男就覺得更有問題，民主黨一向話自己「和平、理性、非暴力」，而家變到類近激進派嘅政團，令人相當慨嘆！

廣男認為，其他非建制派係畀激進選民投票選入立法會，佢哋要交戲畀班支持者睇，越做越激；但係，民主黨作為溫和民主派，一向標榜自己理性論政，而家變到好似激進派咁，廣男認為佢哋唔止損害到議會嘅運作，而係佢哋會失去忠實支持者嘅支持，最終付上沉重代價。

以上分析，絕對唔係危言聳聽，大家諗下，民主黨作為非建制派嘅老大哥，一向予人溫和、理性形象，但而家越走越激，講激進佢哋又唔夠班自決派或者社民連等咁激，講溫和佢哋實質已經唔溫和，喺兩頭唔到岸嘅情況下，佢哋仲有咩支持基礎呢？

發生擾亂議會運作嘅事件，許智峯絕對唔係唯一參與者，亦唔係民主黨入面極少數嘅激進議員，之前梁頌恆、游蕙禎帶埋議員助理衝擊會議果時，許智峯同埋「票王」鄺俊宇都有份協助同包庇梁、游，一齊同啲保安對峙。明明之前先話唔會幫梁、游，以免畀人感覺民主黨認同二人言行，轉頭自己啲黨員就喺議會搗亂埋一份，民主黨唔係仲話自己溫和、理性論政呀？

後生嘅民主黨議員故然不再溫和，老一輩嘅民主黨議員一樣幫唔落；作為現時立法會最資深嘅議員涂謹申，喺發生宣誓風波初頭仲包庇梁、游等人惡行，話有啲議員只係以輕鬆、幽默嘅方式宣誓，完全唔理大是大非。廣男希望民主黨明白，佢哋個「招牌」其實已經同以前差好遠，如果喺一啲大是大非嘅問題都左搖右擺，咁佢哋嘅聲譽、「招牌」恐怕遲早保唔住。

其實，如果係溫和、理性論政嘅民主派，就應該「是其是、非其非」，如果覺得宣誓時辱華、宣「獨」係有問題嘅，應該勇敢地直斥其非，部分市民支持嘅係仲肯講下道理、唔搞事嘅民主黨；如果搞到自己講溫和又唔溫和，講激進又唔夠激，廣男真係唔知民主黨係咩定位、咩立場！

原圖：RTHK