人大常委會正式就《基本法》第104條釋法，坊間預計梁頌恆、游蕙禎應該會失去議員資格。事實上，除咗梁、游二人之外，另一名「自決派」人士劉小麗同「學者」姚松炎其實都極有可能已經喪失議員資格。點解？因為法律原則係一視同仁囉！梁、游受到《基本法》同人大常委會解釋約束，咁劉、姚兩個都分別，佢兩個首次宣誓，誓言同樣有「不準確、不完整、不莊重或者不一致」之嫌，分分鐘會喪失議員資格添！

劉小麗、姚松炎不能自外於《基本法》

根據人大常委對《基本法》第104條嘅解釋，宣誓除咗必須真誠、莊重，亦必須準確、完整，並且要同法定誓言一致，否則就會失去就任相應公職、即係立法會議員嘅資格。劉小麗以「超龜速」宣讀誓詞，事後仲喺Facebook自吹自擂，承認自己所讀嘅係冇串連、連貫性同意義嘅誓詞，講到明「我所讀的是九十多個沒有串連的獨立字句 毫無連貫性及意義可言」，嘩，明顯就係不莊重同不完整嘅誓詞啦！

至於姚松炎，佢喺誓詞中間加插「爭取真普選」等字句，明顯係同法定誓言不一致，如果嚴格依照《基本法》行事，廣男認為佢哋兩個都應該失去議員資格囉。根據夏正民法官於2004年嘅判決，除非經立法會修改，否則立法會議員必須按照既定誓詞宣誓，唔可以隨意改動，否則立法會秘書處都無權監誓；所以呢，就算唔釋法，姚松炎嘅宣誓方式都唔合格！

有人質疑，相比起梁、游，其實劉小麗同姚松炎冇侮辱全球華人，唔使褫奪佢哋議員資格咁嚴重呀？老實講，兩個人宣誓「玩嘢」嚴唔嚴重係一回事，係咪應該喪失議員資格又係另一回事；如果根據《基本法》第104條梁、游要失去議員資格，而劉小麗、姚松炎就可以避開法網嘅話，咁執法標準就會變成不一致，亦鼓勵咗非建制人士以其他唔同方式「不合法」宣誓。廣男認為，既然劉小麗、姚松炎選擇咗喺宣誓嘅時候要「型」要「玩嘢」，咁「型」都要付出代價嘅。

加料、改字 明顯不是依法宣誓

對於今次釋法引起嘅爭議，好多人都對追溯力問題非常關心。其實，釋法係對法律原意嘅闡明，唔係新立法，所以佢嘅效力喺佢所解釋嘅法律生效時已經存在。至於坊間話釋法等於「僭建」、「再立法」等，廣男無意同佢哋爭論，但《基本法》第104條要喺就職時「必須依法宣誓擁護 … 效忠 …」，就字面睇都知道要宣讀法定誓言，而唔係可以隨便亂讀、加料或者改字；《基本法》第158條之所以寫明《基本法》解釋權屬於全國人大常委會，就係知道有時法律條文有待釐清，人大常委會就要履行佢哋嘅職責。

原圖：選舉事務處