「一、二、三，衝呀！」唔係打緊欖球、唔係超市大減價衝入去掃貨，講緊嘅係「青年新政」同一班本土派暴民喺立法會大樓內衝擊保安嘅場面。今次事件令到六位保安員受傷入院，雖然已經發生兩日，相信唔少市民都同廣男一樣，記憶猶新。今次事件凸顯一個大問題，就係「本土派」暴徒已經由衝擊立法會大門，變為衝擊立法會內部，將來呢班用議員助理身份作為掩飾嘅人形物體，如果聯同立法會大樓門外嘅暴徒一齊衝擊嘅話，老實講，立法會大樓淪陷嘅機會都非常高！

並不是危言聳聽

喂，唔好以為廣男吹水喎，上午情況真係有可能出現架！大家唔好唔記得，「佔中」期間，熱血公民就曾經以大話去號召一批激進份子去衝擊立法會，打爛晒正門玻璃外，其實已經整開咗一個缺口，好彩立法會大樓當時有警察駐守，班暴徒「佔領立法會」嘅目標先唔可以得呈！

當時立法會大樓裡面冇內宄，警察先至守得住座立法會大樓，不過大家唔好唔記得呀，為咗尊重立法會嘅獨立性，立法會大樓平時係唔會有警察駐守，代表咩呀？代表其實立法會大樓非常「脆皮」，要爆入去亦唔係想像中咁難囉。

裡應外合 立法會保安無從防避

可能又會有人問，喂，就算有本土派暴徒喺立法會大樓裡面遊走，都證明唔到「裡應外合」一定有效果啫！呢呢呢，咁又錯喇，「裡應外口」效力幾宏大，其實一早已經展示過出嚟。又係講返「佔中」，記唔記得呀，當日幾個所謂學界代表，即係周永康、岑敖暉同黃之鋒幾個，有一晚FAKE完人去「進攻」政府總部後，佢幾個就喺反對派議員包庇下，走晒入立法會大樓避難。

就係呢件事，證明只要有自己友喺立法會工作，成座大樓保安就形同虛設，無掩雞籠一樣架咋。

暴徒進駐立會令人擔憂

老老實實，廣男講白少少，一日「青年新政」兩件人形物體仲喺立法會，本土派輕易佔領立法會大樓嘅機會都唔會減少。呢班暴徒，連喺旺角掟磚都敢，仲有咩唔敢做吖。最徹底嘅做法，始終係永遠將主張「港獨」嘅本土派趕出立法會，香港人，你仲以為台灣嗰邊霸佔立法院會議場地嘅事唔會喺香港發生？咪玩啦！

圖片連結：無綫新聞截圖