如果大家知道有個「暴力王」喺立法會自己出入兼遊走，唔知大家會有咩感想。話說「青年新政」兩件人形物體日前再次畀立法會主席梁君彥裁定唔可以宣誓兼開會後，竟然糾眾搞事，十幾個不明來歷、相信係本土派份子嘅人，竟然衝擊立法會會議室，期間仲同保安推撞，搞到六個保安入咗醫院。

廣男喺度並唔係要譴責呢班本土派，講真，佢哋暴力前科纍纍，再鬧都冇意思。我反而想講，睇住段新聞片，竟然發現原來「暴力王」黃台仰潛伏喺班衝擊保安員嘅暴徒之中，身上仲掛住個疑似可以自由出入立法會嘅證件！嘩，大佬，唔係咁搞呀？

據報道，嗰班衝擊立法會會議室嘅暴徒好有可能係「青年新政」兩件人形物體嘅助理，之前亦有報道話，得到暴力團「本土民前前線」加持而勝出嘅「青年新政」會聘用大量本土派人士做助理，今次見埋黃台仰戴證喺立法會行來行去，即係個報道準確無誤囉。

立法會成狂人聚腳地

睇住黃台仰可以大剌剌出入立法會，對唔住，感性啲都要，廣男真係好無奈、好想喊、好憤慨。一個涉嫌發起同參加旺角暴動嘅狂徒、一個自稱日日用「支那」去鬧中國嘅無恥之徒，而家竟然可以大模廝樣自由出入神聖莊嚴嘅立法會大樓，立法會成為一班狂徒嘅聚腳地，作為香港人點可以唔心酸？

冇架、冇架，呢篇文冇乜論點，純粹係感性發洩。廣男唔知大家點睇今日立法會嘅亂象，你哋如果堅持放班癲嘅入去立法會唔係問題嘅話，作為小小一名選民，既唔識傷害他人身體、亦唔識無視他人感受去衝去撞，最終都只可以無奈接受啫。不過咁，暴力愈大、反彈亦會愈大，今日有人話唔明點解中央政府要咁「強硬」，我反而想問一句，面對住班可以自由出入立法會嘅狂徒，試問你仲可以點「軟」？你教我囉。

原圖：無綫新聞截圖