今日立法會大會召開，一如外界所想，仍然係一片混亂，會議根本冇辦法順利進行，非建制派一早有晒「玩嘢」攻略，等劉小麗「成功」宣誓之後、梁繼昌提出呈請書之後，就配合梁頌恆、游蕙禎入場「自行」宣誓，梁頌恆仲要趕都唔肯走。你無聽錯，梁、游係想「自行」宣誓，非建制派喺咁嘅環境仲要包庇佢哋，連公民黨毛孟靜、民主黨許智峯、梁繼昌等溫和非建制人士都出手，阻止保安執行立法會主席梁君彥裁決，民主黨黃碧雲唔係講過唔會幫梁、游，廢事公眾以為民主黨同意佢哋嘅行為咩？為咗反政府，連是非對錯都拋諸腦後，何必呢？

有發言權或言論自由 不等於還有權入議會宣誓

根據非建制派嘅口徑，雖然佢哋唔同意梁、游二人言行，但都誓死要捍衛佢哋嘅發言權。廣男又咁睇，捍衛任何人嘅言論自由，大家當然冇異議，但如果梁、游二人嘅言行既侮辱國家同民族，又可能違反《基本法》、《宣誓聲明條例》，呢個唔係有冇發言權嘅問題；佢哋就算有發言權，都未必再有權利宣誓，因為佢哋已經「作出」拒絕或忽略誓言嘅言行，非建制派可以支持佢哋繼續發表政見，但有冇權入議會宣誓係另一回事，唔應該混為一談。

又要威又要戴頭盔

非建制派嘅處理手法，廣男認為係貫徹佢哋「又要威又要戴頭盔」嘅作風，喺宣誓辱華事件上，佢哋知道梁、游錯到離晒譜，但又明白唔可以完全唔理佢哋，所以明知佢哋辱華、搞「港獨」，都一邊話佢哋係有唔啱，但唔駛鬧得咁厲害同唔畀佢哋宣誓呀？

喂，既然唔啱，仲可能違法，你哋唔係都唔同意嘅咩，點解仲要批評唔畀佢哋宣誓，會唔會有啲自打嘴吧？呢種想兩邊討好嘅想法，係就係唔會得失太多支持者，但廣男想講，就算手執民主旗幟都好，「唔啱就唔啱，違法就違法」，呢單嘢根本冇灰色地帶可言，繼續包庇呢啲宣獨人士，唔單止議會輸，成個香港都遲早畀佢哋搞到冧檔。

另外，對於人大會常委會唔會就宣誓事件釋法嘅問題，廣男想講，如果事件已經牽涉到國家統一、安全，法例又有未釐清嘅地方，交由人大解釋，係權衡輕重、利弊嘅情況下，比較可行嘅辦法，亦都係較快處理到問題嘅方法。如果等到案件去到終審先算，到時「港獨」可能已經遍地開花，香港已經元氣大傷，為時已晚。

原圖：無綫新聞截圖