仲未完成宣誓嘅立法會議員劉小麗，日前出席城市論壇時畀一個中年男子「掟鞋」，事後果位中年男子被捕，劉小麗就發表聲明譴責暴力。對於喺公眾場合發生襲擊事件，廣男就算同非建制派嘅立場唔同，都一樣唔會支持；係，廣男係好討厭劉小麗嘅一言一行，例如係佢以「龜速」宣誓而可能違反《宣誓及聲明條例》、例如佢敢做唔敢承擔後果，而家又想再宣誓拎返個議席。但就算係咁，都唔代表可以向佢施襲。

「己所不欲 勿施於人」 不同立場也誓反暴力

廣男明白，劉小麗嘅言行有幾惹人反感，好似佢以「龜速」宣誓，仲喺自己Facebook講到明自己宣誓時所讀嘅係冇串連嘅獨立字句，無連貫性同意義可言。冇錯，佢可能已經違反《宣誓及聲明條例》；不過，雖然眾所周知劉小麗極衰，我哋都應該保護佢嘅合法權利。

廣男又明白，好多人覺得劉小麗嘅一言一行，根本同佢學者嘅身分極不相稱。舉個例，喺立法會因宣誓問題而流會嘅事件，劉小麗批評建制派流會都算，仲要話之前非建制派搞流會、要拉倒新界東北前期撥款等議案係為「公義」，簡直豈有此理！如果推動土地房屋嘅議案係不義，係咪唔研究、唔起樓解決住屋問題先叫公義呢？不過，雖然眾所周知劉小麗極衰，我哋都應該保護佢嘅合法權利。

焦點應集中於劉小麗的議員資格

廣男明白，喺港獨問題上，劉小麗又口口聲聲批評特首係幕後黑手，廣男真係想問，推動港獨、想將香港陷於險境嘅港獨派，劉小麗唔譴責都算，反而發聲批評官員先係有罪，劉小麗除咗有個大專講師名銜同博士學位，佢嘅表現似一個學者咩？不過，雖然眾所周知劉小麗極衰，我哋都應該保護佢嘅合法權利。

廣男亦都明白，劉小麗喺城市論壇上亂講一通，話邊個選特首都冇用，因為佢心目中特首一定要配合民間力量去掀起憲政危機，咁先算得上係「好特首」。作為立法會議員，支持、鼓勵、呼籲特首唔好同中央政府溝通，仲要盲目同中央政府對抗，冇錯，劉小麗的確係九唔搭八，但即係咁，我哋都應該保護佢嘅合法權利。

廣男認為，大家唔應該因為劉小麗嘅言行而認定佢畀人掟鞋係抵死，因為無論如何我哋反暴力嘅立場始終不變。對待劉小麗呢啲「盲反」政府嘅政客，正確做法應該係將佢懷疑拒絕或忽略誓詞嘅言行追究到底；同梁頌恆、游蕙禎唔同，梁、游始終唔認自己拒絕或忽略誓詞，但劉小麗已經喺自己社交媒體講到明自己係有意讀出「冇意義」嘅所謂誓詞，既然佢咁坦白，大家亦唔好對錯焦，嚴正查究佢係咪已經喪失議員資格仲好啦！

原圖：選舉管理委員會