建制派立法會議員集體要求立法會主席唔畀梁頌恆、游蕙禎宣誓，立法會主席梁君彥亦根據最新形勢同《議事規則》決定暫緩二人宣誓。事實上，梁頌恆、游蕙禎發表辱華言論至今已經成半個月，唔道歉仲要不斷狡辯，最近梁頌恆話自己問心無愧更加係聽到人眼火爆，如果畀佢哋兩個宣誓做議員，簡直係天理不容。

建制派不能再退

如果大家有留意議會新聞，除左前日立法會大會畀梁頌恆、游蕙禎、梁國雄同埋鄭松泰搞到休會，喺上屆會期非建制派多次癱瘓議會運作，醫改過唔到、版本修訂條例過唔到、創科局拖左好耐先過到等等，一次又一次將政府、建制派逼到牆角，試問又邊次唔係去到盡？

有人話建制派批判梁頌恆、游蕙禎似文革，其實最鍾意以文革手法批判其他人嘅，正正就係非建制派班人，無論係國教、免費電視發牌甚至違法佔領行動等，每一次，係每一次都想將政府、建制派置之死地，有幾時願意傾、願意坐低解決問題呢？答案係無，因為就算拉倒議案甚至拉倒政府，佢哋之後都會話特首由選委會選委選出嚟，所以要公民提名嘅「真普選」，根本永遠都唔會滿意同妥協。

梁、游不道歉 自斷下台階

今次梁、游辱華事件涉及國家、民族甚至二千萬在二戰期間犧牲嘅中國英靈，試問侮辱國家、民族，仲要違法拒絕或忽略誓言嘅人，點解仲要畀佢哋宣誓做立法會議員呢？建制派今次強硬起嚟，甚至不惜發動流會都要阻止二人宣誓乃義之所在，如果梁、游二人一開始唔係要玩嘢，或者喺事件未發酵到好嚴重嘅時候就向市民道歉，今日佢哋都唔會無彎轉。

所謂「早知今日，何必當初」，佢哋而家先話要根據《議事規則》、正正常常咁宣誓已經太遲，因為佢哋連悔改之心都冇；至於建制派，可謂已經「只有眼前路，沒有身後身」，既然係做正確的事，就做到底，為國家、民族討回公道。

原圖：takungpao