近日討論得最hit嘅社會話題，始終離唔開梁頌恆同游蕙禎兩個嘅辱華言論以及佢哋嘅議員資格問題。廣男認為，當大家討論緊應唔應該畀佢哋再宣誓嘅時候，其實有一啲更基本嘅事實，大家（尤其係非建制派）應該睇清睇楚：佢兩個喺宣誓時候明顯忽略或拒絕誓詞，近日又走到台灣宣揚「自決」（即港獨），即係叫立法會主席畀佢哋一方面宣揚港獨，另一方面又畀佢哋宣誓效忠《基本法》，喂，好矛盾啫！

口裡說不 身體最誠實

廣男真係唔知道梁頌恆、游蕙禎係真心傻定特登玩嘢，喺呢個風頭火勢嘅時候走去台灣「播獨」。對於本身已經覺得佢哋係有心拒絕、忽略誓言嘅香港人而言，佢兩個宣揚「自決」宣到去台灣，效果只係令人更加覺得佢哋無心宣誓，更遑論效忠香港特區同《基本法》呢？

梁、游二人口裡說不，話自己「唔係」拒絕、忽略誓詞，去信立法會主席要求重新宣誓，但實質身體就非常誠實，仲趁得閒飛去台灣宣揚「自決」；事實上，佢哋嘅行徑已經話咗畀香港人聽，佢哋係唔會效忠《基本法》同香港特區，佢哋一心只係討好部份投票畀佢哋嘅本土派選民。

青年新政今次宣誓侮辱全球華人，除咗「吸睛」外，某程度上都係向佢哋嘅老闆（極端主義者？）交差。特區政府早排就住佢兩個嘅議員資格提出司法覆核，廣男唔敢影響法官獨立判決，但就好希望法庭都留意一下呢兩位「議員」近日嘅一言一行。佢兩個係唔係、會唔會真誠宣誓效忠《基本法》以及香港特區？心水清嘅，一定睇得出嘅。

原圖：wenweipo