俗語都有話：「錯要認，打要企定」，梁頌恆、游蕙禎發表辱華嘅「支那」言論故之然令人憤怒，但更嬲嘅，係佢哋兩個到而家依然死不悔改，唔肯就自己嘅侮辱言論道歉，建制派噚日離場抗議唔畀佢哋兩個宣誓，都係合情合理。廣男本來都唔想成日講梁頌恆，但聽到佢到今日依然話自己宣誓時「冇指涉任何人」，所以係冇侮辱人，喺呢個moment廣男感覺到自己要爆喇！

不指涉人 就不會侮辱人？

根據梁頌恆嘅「神」邏輯，佢雖然發音用「支那」二字代取「中國」，宣誓過程中冇指涉到任何人（即係冇指名道姓），所以亦唔可能侮辱人；廣男真係想講，梁頌恆如果真係咁諗，佢嘅邏輯思維真係好有問題。如果所謂「唔點名」就唔會侮辱到人，咁廣男想問，如果廣男話青年新政係「XX」，咁算唔算侮辱佢同游蕙禎？

唔好誤會，廣男講「XX」唔係講粗口，舉個例，如果廣男話青年新政係「混蛋」、「笨蛋」或者「龜蛋」（舉例純為論證，絕無意侮辱任何人或組織），咁講法廣男同樣無指名道姓講青年新政邊個邊個係「混蛋」，但就算廣男無點名例如話梁頌恆或者游蕙禎，大家接收到嘅意思，都好可能覺得廣男話緊佢哋兩個係「混蛋」。

梁頌恆、游蕙禎好歹都叫做知識分子，理應非常明白事理，事不如今唔悔改不特止，仲要用一啲常人聽落去都完全唔通嘅回應去狡辯，咁低質素（品格就更加唔駛講）嘅人，真係有資格做立法會議員？難怪今日電台Phone-In節目，有自稱係「本土派」支持者嘅聽眾都忍唔住打電話上去鬧梁頌恆。

劉小麗真係大專講師？

另一個今日有上電台Phone-In節目嘅候任立法會議員劉小麗，同樣係歪理連連，話建制派製造流會係「洩憤」，非建制派之前拉布、製造流會就係為「公義」。大姐，要追究侮辱國家、同全球華人嘅言論，或者唔畀冇資格做「香港特區」立法會議員嘅人宣誓，呢啲先叫做「公義」，而唔係叫「洩憤」！

再者，劉小麗舉例話反對新界東北前期撥款係要拉倒不公義議案，咁唔通覓地建屋、解決基層住屋問題就叫「不公義」？佢哋「盲反」政府就叫「公義」？聽講劉小麗係博士、係大專講師，聽到佢啲言論，廣男真係有少少唔敢相信原來香港會教出呢啲「博士」囉。

原圖：RTHK