本土自決派候任立法會議員劉小麗尋日收到立法會主席梁君彥通知，話佢宣誓時誓詞字與字間停頓時間過長，令人難以明白誓詞內容，認為呢種態度並非嚴肅看待誓詞，所以裁定佢宣誓無效。劉小麗表面斯文、內裡激進，梗係即刻Fight Back啦，即時話唔接受裁決，要求梁君彥就宣讀誓詞嘅語速提出客觀準則。是咁的，廣男覺得劉小麗其實唔駛咁勞氣吖，佢嘅誓詞的確係可以令人明白架，不過就需要用啲特別嘅方法，廣男就教大家三個方法，等大家都「聽」得明劉小麗嘅誓詞。

方法一：一路聽 一路逐隻字抄低佢

廣男當日有聽劉小麗宣誓，由於佢每隔幾秒先讀一個字，平常人就咁聽真係好難聽得明；所以，如果大家一路聽劉小麗宣誓，可以一路逐隻字抄低，抄晒後再睇番佢讀嘅誓詞，相信就會「聽」得明明白白喇！

方法二：快速播放其宣誓片段

雖然話係方法二，但呢個方法都未必有用，因為劉小麗宣讀每個誓詞之間的停頓位實在太長，就算將佢宣誓嘅片段快播三、四倍，都唔保證大家一定會聽得清清楚楚、明明白白，飛得太快仲可以「飛過頭」添。不過點都好過等佢幾秒先「戥」一個字出嚟，完全唔知佢講緊乜嘅。

方法三：自行剪接其宣誓片段 再重新播放

用呢個方法就肯定聽得清楚明白喇，首先呢，將劉小麗嘅宣誓片段逐隻字剪出嚟，然後又將佢「嵌」番埋一齊，雖然相當之花費心力，但咁做就一定可以將佢嘅誓詞聽得清楚、明白喇。嗱嗱嗱，《港人講地》即日就有咁做喇，不過呢要咁樣剪接先聽得到，乜仲可以算係宣誓咩？

何謂莊重 劉小麗心知肚明

以上內容，純屬搞笑。老老實實，劉小麗身為「博士」，被裁定宣誓無效仲狡辯語速快慢冇準則，擺明係玩嘢。今日香港，最缺乏就係「常理」，「常理」其實並唔係虛無縹緲架，至少法庭判案，參考所有證據後，一定會考慮證人或者被告嘅行為「合唔合常理」。

所謂宣誓，最重要係監誓人同埋公眾都可以聽到、知道宣誓者講乜，否則點知佢講咗咩？劉小麗宣誓語速特慢，常人根本冇可能聽得明內容，咁點可以叫宣誓先？

廣男喺度想挑一挑機，如果劉小麗博士真係覺得咁講嘢係「莊重」嘅話，請問一句，佢選舉果時對住班選民，又或者喺選舉論壇，又有冇試過咁「莊重」去向選民闡述理念、說服選民投票畀佢呢？劉小麗咁支持民主，選舉時「拉票」喎，點解唔用佢心目中咁莊重嘅方式先？

玩嘢唔緊要，玩完唔認都唔緊要，廣男最怕劉小麗玩唔起，又或者唔玩到底，轉頭又認衰要求重新宣誓，呢啲只係攞嚟瘀咋陰公豬。

圖片來源：選舉管理委員會網頁