本土自決激進組織「青年新政」因為用「支那」二字侮辱全球華人而受盡千夫所指，政府日前發聲明批評佢兩個嘅表現「有損立法會議員應有的尊嚴，言詞和行為「甚至有冒犯」成分，傷害國人感情，特區政府予以譴責」。講真，只要稍為有少少良知同尊嚴，「青年新政」都好應該道歉謝罪，偏偏佢兩個依舊死不悔改，仲大言不慚話「立法機關不由政府管」，又話政府唔應該干預喎。呢啲咁無知嘅「青年才俊」，就等廣男一嘢KO佢哋啦！

法律層面：特首代表香港

話政府唔可以譴責你兩個，呢個說法唔係無知，就係扮唔知。根據《基本法》第四十三條：「香港特別行政區行政長官是香港特別行政區的首長，代表香港特別行政區」，呢條代表住咩呢？代表特首同政府就係香港嘅代表，你兩個喺立法會宣誓期間侮辱中國、侮辱二次大戰期間戰死嘅2,000萬中國人，特區政府作為香港代表，發聲明譴責你簡直係「天經地義」！你兩個人形生物，竟然仲想反咬一口，簡直係恬不知恥。

道理層面：侮辱死者 沒資格稱為「人」

政治從來都係人類嘅事，連做人嘅資格都冇，根本就唔應該講政治。上一段已經講過，「青年新政」兩位候任議員，發表「反人性、反人類」嘅言論，就算聯合國裡面，都肯定冇一個成員會認同你兩個。

不過咁，雖然佢兩個侮辱中國同全世界華人，行為的確係異常卑劣，不過「沒有最衰，只有更衰」，佢兩個事後竟然「敢做唔敢認」，一時話自己讀音唔準、一時又話係家鄉口音，行為之無賴，無異於流氓癟三。做錯、玩大咗，以佢兩個咁年輕，香港人又愛惜年輕人，相信好快原諒你哋，偏偏你兩位死口唔認，既無政治道德、又冇政治勇氣，單單譴責已經係便宜咗你兩個啦！

「青年新政」可恥已經係共識，佢兩個仲好意思話人「干預」立法會事務，證明佢兩個係幾冇人性。廣男真係好想問一句，「立法會事務」五個字，幾時變成「反人性、反人類」嘅同義詞？你兩個係民意代表就大晒？民意代表就可以侮辱2,000萬死難同胞？你兩個憑咩呀？