立法會議員今日宣誓就職，其實喺宣誓前，有部分非建制派議員已經放晒風話自己宣誓時候會玩嘢，其中幾個本土自決派「玩嘢王」，包括梁頌恆、游蕙禎同姚松炎先後喺誓詞「加料」，立法會秘書長陳維安表明冇權為佢哋監誓，都可以話係意料中事。呢幾位非建制派議員好似好威，其實好可能會戴番個「頭盔」，相信佢哋喺下次宣誓或者之後，始終都會乖乖宣誓，大家即管拭目以待囉。

由以前梁國雄、黃毓民年代開始，宣誓時候「玩嘢」變咗例行公事咁，一班激進支持者投票畀激進議員，或者而家所講嘅本土派、港獨派，如果乖乖哋宣誓，佢哋好難向支持者交差架嘛。所以明知第一次宣誓玩嘢、「加料」會有問題，佢哋都要硬着頭皮玩嘢，如果唔係啲支持者就會話佢哋咁聽話，點喺議會抗爭呀。

始終會戴番頭盔 乖乖宣誓？

今日見到梁頌恆、游蕙禎同姚松炎喺宣誓時候搞小動作，大家可能以為佢哋會抗爭到底，但廣男幾乎肯定佢哋最終都會遵守番《宣誓及聲明條例》，點解？其實梁國雄2004年嘅時候已經就誓詞問題司法覆核過，當時高等法院就拒絕梁國雄嘅司法覆核申請，仲話法令規定議員要按照規定嘅格式宣誓。如果議員唔遵守規定，宣誓就唔合法甚至無法律效力，大家認為佢哋三個會唔會撐到底呢？

除非佢哋三個「視死如歸」、抗爭到底啦，否則始終都係要遵守宣誓相關法例，最多咪好似梁國雄中間停頓下、搞下小把戲。不過，廣男就覺得佢哋咁玩法，最後又係要乖乖哋宣誓，其實仲瘀皮，開頭係威係勢喺度抗爭，最後又要戴番個頭盔，頭耷耷宣誓。廣男咁推斷會唔會太武斷，睇小咗班議員嘅抗爭「毅力」？唔知呢，不過對於呢幾位本土自決派議員嚟講，議席重要過天，成十皮嘢一個月架，佢哋又點會放棄吖。

搞小動作、玩嘢，都係想向自己班激進客仔交代啫。得啦，知道你幾個要搵食喇，乖乖哋返去宣誓啦。