成日以做過廉政公署調查員自居嘅民主黨立法會議員林卓廷，近日又有新猷。佢投稿去《信報》回應資深傳媒人褚簡寧對佢嘅質疑，繼續就UGL事件老屈特首梁振英，話佢同UGL所簽嘅係秘密協議，而且上任特首一職後，冇向行政會議申報協議內容喎。唉，真係講到口都臭，梁振英同UGL嗰份並唔係乜嘢秘密協議，賣盤交易中各方持份者都知道協議內容，就連率先報道呢件事嘅澳洲傳媒都已經承認事件，甚麼某程度上撤回報道，你仲拗啲乜喎？

一早講過 根據現行規定不必申報

講到點解唔申報呢個問題，我哋應該理性啲睇，到底現行要求有冇要求申報先。答案係「冇」，呢樣政務司司長林鄭月娥已經在立法會講過幾次，我都唔想再重複；可能有人會問：「嘩！咁都唔使申報？梁振英幫私人公司做嘢喎！」嗱，呢個就係重要喇！

係，梁振英的確係根據合約分期收錢，收錢時間仲係佢已經上任特首一職之後添，不過，呢個只係UGL提出嘅付款安排，並唔係代表梁振英等收錢期間有為UGL做嘢。

呢個概念好重要，大家一定要分清楚先得！

特首早表明不可有「利益衝突」

仲有一點，特首梁振英喺協議上面親自寫明，就算UGL提出任何推廣協助嘅要求，工作性質都必須要「合理」，而且唔會產生任何「利益衝突」。講真，份合約寫到咁，你個林卓廷仲可以咬住唔放，都真係算你好嘢！

講真，如果大家心水清嘅話，好應該清楚成件事性質係啲乜。爆呢單嘢嘅澳洲傳媒，選擇喺「違法佔領」如火如荼期間「爆料」，客觀效果係令到成個香港「黐晒線」，佔領緊罪犯們當然開心啦，又有藉口推翻梁振英喎；反對「佔領」嘅義士呢？講真，士氣點都會有流失囉。

澳洲傳媒早證明不是「秘密協議」

哈，點知個澳洲傳媒一個星期後又「自己摑自己」兩巴喎，澄清返話單嘢根本唔係乜秘密協議，而係各方持份者都知道嘅普通離職安排。大佬，而家先講？畀你玩死啦！乜你唔係一早已經收到成份文件嘅咩？點解一個星期後先知道，原來個「故仔」不值一哂呀？如果話唔係想趁機拉梁振英落台都冇人信啦！

其實作為香港人，大家都知道大部份香港人面對「醜聞」有乜習慣，係囉，就係「先入為主」之嘛。講真，梁振英同林鄭月娥已經澄清咗咁多次，反梁反上腦嘅人聽唔聽得入耳？有冇思考過梁振英嘅解釋合唔合理？

不過，理性同常理，喺今日部份人眼中已經唔重要，政治立場可以凌駕一切，真係問你死未。

圖片來源：香港電台即時新聞、gizmodo.com